Üsküdar Mahkemesi 1 Numaralı Sicil (H.919-927 / M. 1513-1521) cilt: 1, sayfa: 346 Hüküm no: 618 Orijinal metin no: [97a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Süleyman’ın Viran köyde dedesinden kalan araziyi tasarruf etmesine mani olan Ali b. İsa’nın müdahalesinin men’ine dair. Fasl Vech-i tezkiretü’l-hurûf oldur ki Hasan b. Süleyman, Ali b. İsa’yı meclis-i şer‘a ihzâr edip şöyle takrîr-i da‘vâ edip dedi ki dedem İbrahim b. Bektaş karye-i Viran haddinde Göküstü demekle ism-i meşhûriyle tahdîd[den] müstağni olan nîm çift yere mutasarrıf olup fevt oldukda İsa ve Süleyman ve Musa ve Nebi nâm oğulları kalıp evlâd-ı zükûr bunlara münhasır olmağın zikr olan ber-vech-i kānûn bunlara intikâl edip mezkûrûndan Süleyman dahi fevt olup zikr olan yerden humus hissesi bana ve Hüseyin nâm karındâşıma [intikâl] etti hâliyâ işbu mûmâ-ileyh Ali bizi hissemize dahl ettirmeyip bi-gayr-ı hakk elindedir dedikde mezkûr Ali dahi cevâba mütesaddî oldu ki zikr olan yerden mezbûr Hasan’ın babası hisse-i mezbûresini tasarruf etmedi müddet-i medîd benim babam mezkûr İsa müstakil tasarruf eder iken fevt olup zikr olan hisse-i humus dahi ber-vech-i kānûn bana intikâl etti deyicek mezkûr Hasan’dan babası merkūm Süleyman’ın hisse-i mestûresine tasarruf ettiğine şâhid taleb olundukda udûl-i müslimînden Nebi b. Davud ve İsa b. Kılağuz şehâdet için meclise hâzır olup müdde‘î-i mezkûrun min-külli’l-vücûh takrîrine muvâfık edâ-i şehâdet edip şehâdetleri li-kevnihimâ ehlen lehâ hayyiz-i kabûlde kılınıp zikr olan hisse mûmâ-ileyh Hasan’a hükm [o]lunup sebt olundu. Tahrîren fî evâsıtı evveli’l-Cümâdeyn sene 925 Şuhûd Ali b. Hamza, Şaban b. Mehmed, Yakub b. Osman ve gayruhum