Üsküdar Mahkemesi 1 Numaralı Sicil (H.919-927 / M. 1513-1521) cilt: 1, sayfa: 346 Hüküm no: 617 Orijinal metin no: [97a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Elhâc Yusuf b. Hasan’ın Başıbüyüklü köyünde on beş yıldır tapuyla tasarruf ettiği yere Yakub b. İbrahim’in müdahalesinin men’ine dair. Fasl Vech-i tezkiretü’l-hurûf oldur ki Elhâc Yusuf b. Hasan meclis-i şer‘a sallallâhu alâ şâri‘ihî hâzır gelip takrîr-i kelâm edip dedi kim Başıbüyüklü nâm karye haddinde mûmâ[ileyh] Elhâc Yusuf’un evi önünde tahmînen İstanbul kilesiyle iki kile tohum alır bir kıt‘a yeri ki mahdûddur büyük çakpelid demekle müte‘ârif bellüd ağacıyla ve mezbûr Elhâc Yusuf’un kovanlığı ile ve nehr-i câriyle ve müte‘ârif yerli kayalar ile zikr olan yeri on beş yıldan ziyâdedir ki mutasarrıfın ve sipâhiye dahi otuz akçe resm-i tapu verip tapuladım. Hâliyâ işbu Yakub b. İbrahim tasarrufuma mâni‘ olur dedikde mezbûr Yakub zikr olan yer babam yeridir deyu da‘vâ edip ammâ mezkûrun on beş yıldan ziyâde tasarrufuna ikrâr ettiği ecilden da‘vâsı ber-mûceb-i kānûn istimâ‘ olunmadıkda zikr olan yeri ber-vech-i tımar mutasarrıf olan Hamza b. Karaca ve Ahmed b. Abdullah dahi hâzırân olup vâkıâ zikr olan mahdûd yer için mezkûrdan be-resm-i tapu meblağ-ı mezbûru bî-kusûr alıp kabz edip zikr olan tapuyu verdik deyicek zikr olan yer mezkûrun tapulu yeri olup kıdem-i tasarruf i‘tibârıyla mûmâ-ileyh Yakub men‘ olunup sıhhat-i tapuya hükm olunup sebt olundu. Tahrîren fî’l-yevmi’l-hâmis aşer min evveli’l-Cümâdeyn sene 925. Şuhûd Mustafa b. Umur, Ali b. İsa, İsa b. Kılağuz ve Şaban b. Mehmed ve gayruhum