Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 96 Hüküm no: 85 Orijinal metin no: [10a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil’in kızı Fatma’nın bekaretini ispatı ve beraat etmesi (…) (…) Dergâh-ı mu‘allâdan bu cânibe hükm-i hümâyûn irâd olunup (…) (…) Umur ve Yusuf ve Ali ve Elif ve Hacı nâm kimesneler kızım Fatıma (…) (…) töhmeti vardır deyu bühtân ettiler. Görülmesin taleb ederim deyu bildirdikde (…) bu husûsu ihzâr-ı husamâ edip ber-mûceb-i şer‘-i kavîm ve örf-i müstakîm üzere tefahhus edip şer‘ ile kānûn ile her ne lâzım ve müteveccih olursa hükm edip yerine koyasın deyu ferman olunmasın ber-mûceb-i emr-i hâkānî meclis-i şer‘a ihzâr olunup teftîş ve tefahhus olundukda mezkûrûn Umur ve Yusuf ve Ali ve Elif ve Hacı hâşâ biz bunun kızına bu vechile bühtân etmedik yaramazlığın dahi işitmedik deyu cevâb verip bunun üzerine yemîn billâh edip emânetlerine nice Müslümanlar kefîl dahi olduklarından sonra mezkûr Halil’in kızı mezbûre Fatıma’ya mu‘teddün-bihâ sâliha ve müstakîme ve mütedeyyine hâtun kişiler gönderilip görüldükde gelip anasından nice doğduysa heman öyledir ve bâkire ve (…?) ve sâlime bulduk deyu haber verdikleri sebebden ve mezkûre hem Fatıma mezbûr nefsânî cihetden alâkası ve münâsebeti yok idiğine yemîn billâh dahi eylediği ecilden ve hem (…) bi isrihim biz bu kızın bundan gayri evvelden âhıra nâ-ma‘kūl nefsânî evzâ‘ın görmedik ve hem kimseyle (…) işitmedik deyu kefîl dahi oldukları cihetden mezkûre Fatıma’nın bu husûsda berâatına hükm olunup sebt-i defter olundu. Fî evâili Cumâdelûlâ sene hamse ve ışrîn ve tis‘a-mi’e. Şuhûdü’l-hâl: İsa b. İsmail, Bahşayiş b. Hasan, İbrahim b. İsmail, İbrahim b. Ahmed, Çalabverdi b. Kudbeddin, Mahmud Çelebi b. Umur, Mahmud b. Abdullah, Ahmed b. Yakub, Fahrü’z-zu‘amâ Mehmed Bey zaîmi Gekvize ve gayruhum