Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 205 Hüküm no: 184 Orijinal metin no: [25a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Yusuf Efendi b. Abdullah’ın mütevellîsi olduğu Şeyhülisâm Sadi Efendi Vakfı’na ait paranın oğlu Halil Çelebi tarafından Mütevellî Hacı Mustafa Efendi b. Hüseyin’e teslîm edildiği Mahmiye-i İstanbul’da Sultan Mehmed Hân Câmi‘-i şerîfi kurbünde vâki‘ merhûm Şeyhülislâm-ı sâbık Muhaşşî-i Beydâvî Sadi Efendi Vakfı’nın bi’l-fi‘il hâlâ mütevellîsi olan el-Hâc Mustafa Efendi b. Hüseyin nâm kimesne meclis-i şer‘-i hatîr-i lâzımü’t-tevkīrde sâbıkā vakf-ı merkūmun mütevellîsi olup bundan akdem vefât eden Yusuf Efendi b. Abdullah’ın sulbî kebîr oğlu işbu bâ‘isü’l-kitâb Halil Çelebi nâm kimesne mahzarında ikrâr ve takrîr-i kelâm edip vakf-ı mezkûr mâlından müteveffâ-i merkūm Yusuf Efendi yedinde defter-i muhâsebe mantûku üzere der-kîse yirmi beş bin sekiz yüz yetmiş iki akçe nukūdu olmağla meblağ-ı merkūm yirmi beş bin sekiz yüz yetmiş iki akçeyi mezbûr Halil Çelebi [25b] bana def‘ ü teslîm ben dahi yedinden bi’t-tevliye ahz u kabz eyleyip baʻde’l-yevm ber-mûceb-i defter-i muhâsebe vakf-ı merkūm mâlından müteveffâ-i merkūm Yusuf Efendi yedinde ve kıbelinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 5 min-Cumâdelûlâ sene 1121 Şuhûdü’l-hâl: el-Hâc Hüseyin b. Abdullah, Hüseyin Çelebi b. Şa‘ban, el-Hâc Mustafa b. Abdullah, Süleyman Çelebi b. Ahmed, el-Hâc Ali b. Abdurrahman, el-Hâc Mehmed Ağa b. ( ), Ahmed Çelebi b. Ali, Ahmed Çelebi Muhzır ve gayruhum mine’l-huzzâr.