Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 204 Hüküm no: 183 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. Hasan’ın kölesi Davud v. Mihail’in hürriyetini ispat etmesi üzerine serbest bırakıldığı İşbu orta boylu açık kaşlı gök elâ gözlü râfi‘u hâze’s-sifr David v. Mihail nâm Yahûdi mahfil-i kazâda kendiye rık olmak üzere vaz‘-ı yed eden Ahmed Ağa b. Hasan mahzarında üzerine da‘vâ ve takrîr-i kelâm edip ben vilâyet-i Anadolu’da Ahıska kazâsında Yahûdiler Mahallesi’nde sâkin hürrü’l-asl olan mezbûr Mihail’in firâşından hâsıl ve zevcesi hürretü’l-asl olan Sara bt. Danyel nâm Yahûdiyeden mütevellid olup aslâ bana ve ebeveynime rık târî olmamışiken mezbûr Ahmed Ağa bana rık olmak üzere vaz‘-ı yed eder suâl olunup kasr-ı yedine tenbîh <> ve sebîlim tahliye olunmak matlûbumdur dedikde gıbbe’s-suâl mezbûr Ahmed Ağa cevâbında mevsûf-ı mezbûr David’i târih-i kitâbdan dört ay mukaddem mahrûse-i Bursa’da Arpa Emîni Mustafa Ağa nâm kimesneden yetmiş guruş semen-i medfû‘a iştirâ edip mülk-i müşterâm olmak üzere vaz‘-ı yedini ikrâr lâkin ber-vech-i muharrer hürriyetini inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden olup mârru’z--zikr Ahıska kasabasında Künbet Mahallesi ahâlîsinden olup mahmiye-i İstanbul’da Mahmudpaşa kurbünde ticâret vechi üzere sâkin Derviş b. Zülfikār ve Süleyman Beşe b. Osman nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ işbu müdde‘î-i mezbûr kasaba-i mezbûrede Yahûdiler Mahallesi’nde sâkin hürrü’l-asl olan Mihail nâm Yahûdinin firâşından hâsıl ve zevcesi hürretü’l-asl olan Sara bt. Danyel nâm Nasrâniyeden mütevellid olup müdde‘î-i mezbûra ve ebeveynine aslâ rık târî olmayıp hürrü’l-asldır biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettikde gıbbe’t-ta‘dîl ve’t-tezkiye şehâdetleri makbûle olmağın mûcebince baʻde’l-hükm mevsûf-ı mezbûrun sebîli tahliye olunmağın mâ-vaka‘a bi’t-taleb ketb olundu. Fî 6 min-Cumâdelûlâ sene 1121 Şuhûdü’l-hâl: Mustafa Çelebi b. Şa‘ban, Süleyman b. Abdullah, Ali Çelebi b. İvaz, Hasan b. Abdullah, Abdullah b. Abdullah, Ahmed b. Mehmed ve gayruhum mine’l-huzzâr.