Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 206 Hüküm no: 186 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Mehmed Beşe b. Ahmed’in Mahmud Beşe b. Ahmed’de olan alacağının tahsili Mahrûse-i Galata tevâbi‘inden kasaba-i Tophâne’de Cihangir Mahallesi sükkânından iken bundan akdem vefât eden Mehmed Beşe b. Ahmed’in sulbiye sagīre kızları Sâliha ve Ümmühani’nin vâlideleri ve tesviye-i umûrlarına kıbel-i şer‘den mansûbe vasîleri olan Emine bt. Musa nâm hatun meclis-i şer‘de işbu bâ‘isü’l-kitâb Mahmud Beşe b. Ahmed nâm kimesne mahzarında ikrâr ve takrîr-i kelâm edip vasîleri olduğum kızlarım sagīretân-ı mezbûretânın babalarından müntakil mâllarından mezbûr Mahmud Beşe zimmetinde altmış bir guruş hakları olup meblağ-ı mezbûru merkūm Mahmud Beşe’den bi’l-vesâye taleb ve da‘vâ eylediğimde ol dahi meblağ-ı mezbûru tamamen def‘ ü teslîm eyledim deyü def‘le mukābele edip ve müdde‘âsını isbât sadedinde iken beynimizde münâza‘ât-ı kesîre cereyân etmişidi el-hâletü hâzihî beynimize muslihûn tavassut edip sulh sagīretân haklarında dahi evlâ ve enfa‘ olmağın beni mezbûr Mahmud Beşe ile otuz yedi guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr otuz yedi guruşun yedi guruşunu târih-i kitâbdan beş gün tamamına değin ve meblağ-ı bâkī otuz guruşu dahi beher ayda birer guruş edâ etmek üzere otuz ay tamamına değin te’cîl eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî [6] min-Cumâdelûlâ sene 1121 Şuhûdü’l-hâl: Mübâşir Ahmed Beşe b. Mehmed, Osman Beşe b. Ömer, Hüseyin b. Abdullah, Mehmed b. Ahmed, Mustafa b. Şa‘ban ve gayruhum mine’l-huzzâr.