Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 207 Hüküm no: 187 Orijinal metin no: [25b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi b. Bektaş b. Abdurrahman’ın Akşemseddin Mahallesi’ndeki evini Seyyid Abdullah Çelebi b. İbrahim’e sattığı Mahmiye-i İstanbul’da Akşemseddin Mahallesi sükkânından Abdi b. Bektaş b. Abdurrahman nâm kimesnenin zevcesi ve tarafından husûs-ı âti’z-zikre vekîl olduğu mahalle-i mezbûre sâkinlerinden Mehmed b. Mehmed ve Halil b. Hasan nâm kimesneler şehâdetleriyle şer‘an sâbit olan Hadice bt. Mehmed nâm hatun meclis-i şer‘-i şerîf-i enverde işbu bâ‘isü’l-kitâb es-Seyyid Abdullah Çelebi b. İbrahim nâm kimesne mahzarında ikrâr-ı tâm ve takrîr-i kelâm edip müvekkilim zevcim mezbûr Abdi akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ bir tarafdan Akşemseddinzâde Mehmed Efendi mülkü ve bir tarafdan Hamza Odabaşı mülkü ve bir tarafdan Bakkāl Hacı Ahmed mülkü ve bir tarafdan tarîk-i hâs ile mahdûd fevkānî bir bâb oda ve bir sofa ve iki bâb tahtânî oda ve bir kenîf ve bir mikdâr havluyu müştemil merhûm Sultan Bayezid Hân Vakfı’na senede dört akçe mukāta‘a-i kadîmesi olup binâsı mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile yüz doksan guruşa mezbûr es-Seyyid Abdullah Çelebi’ye bey‘ ve teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabûl eylediğinden sonra semeni olan meblağ-ı mezbûr doksan guruşu mezbûr es-Seyyid Abdullah Çelebi yedinden tamamen ahz u kabz eyledim baʻde’l-yevm menzil-i mahdûd-ı mezkûr cemî‘ müştemilâtıyla merkūm es-Seyyid Abdullah Çelebi’nin mülk-i müşterâsıdır keyfe mâ yeşâ ve yehtâr mutasarrıf olsun dedi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 7 min-Cumâdelûlâ sene 1121 Şuhûdü’l-hâl: Halil Efendi b. el-Hâc Mustafa el-İmâm, el-Hâc Musa b. Ali, Muslu Çelebi b. Osman, Mehmed Çelebi b. İbrahim, es-Seyyid Ali Çelebi b. Abdullah, Ebûbekir b. Mahmud, Osman Efendi b. eş-Şeyh Ahmed, Mahmud Çelebi b. Mustafa, Ali Çelebi b. Ca‘fer, Receb Beşe b. Ca‘fer, es-Seyyid İsmail Beşe b. İbrahim, Mustafa Çelebi b. Şa‘ban, Mehmed Ağa Kethüdâ-yı muhzırân, Ali Çelebi b. İvaz, Ali Beşe b. Bâli ve gayruhum mine’l-huzzâr.