.:: İstanbul Kadı Sicilleri ::.


Üsküdar Mahkemesi 2 Numaralı Sicil (H. 924-927 / M. 1518-1521)
cilt: 2, sayfa: 139
Hüküm no: 208
Orijinal metin no: [23b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Nebi b. Musa’nın, ölen kardeşi Mahmud’un sattığı bozahane hissesini Hamza b. Sarı’nın kullanmasına mani olmaması

Vech-i tezkire oldur ki Hamza b. Sarı meclis-i şer‘a Nebi b. Musa’yı ihzâr edip bundan akdem karye-i Çonkara’da senin karındaşın olan müteveffâ Mahmud hâl-i hayâtında iken Çonkara Bezirhânesi demekle meşhûr bezirhâneden sülüs hisseden nısf hissesin bana üç yüz akçeye bey‘ etmiş idi şimdi sen benim tasarrufuma mâni‘ olursun dedikde mezkûr Nebi cevâb verip sâbıkan seninle bu husûs için Gekvize kadısı Mevlânâ Hacı Halife’ye murâfa‘a edip karındaşım hissesin mezbûre (…) ben nâ-bâliğ iken verip sonra ben bâliğ olup sekene şüf‘a tuttuğumu şuhûd-ı udûl ile isbât edip kadı-ı mezkûr hisse-i mezkûreyi bi tarîki’ş-şüf‘a bana hükm edip sene ışrîn ve tis‘a-mi’e târihiyle müverrah hüccet verdi deyip ibrâz ettikde nazar olup zikr olan hüccet alınalı beş yıl olup mezkûr Nebi şüf‘a da‘vâsında hüccet(?) târihinden heman bir hafta evvel edip işhâd ettiğine meclis-i şer‘de ikrâr ettiği sebebden ba‘de’l-bülûğ mezkûr Nebi işhâd-ı şüf‘a ettiği beş yıldan sonra olduğu ma‘lûm olıcak hüccetine amel olunmayıp zikr olan bezirhânenin sülüs hisseden nısf hissesin mezkûr Hamza’ya hükm olundu. Fî evâhiri Receb sene 925.


Şuhûdü’l-hâl: Seydi b. Durmuş, Şaban b. İlyas, Mustafa Çelebi b. Seyrânî, Osman b. Gevhertaş, Ali b. İlyas ve gayruhum Udul Dânişmend