|
Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 140 Hüküm no: 209 Orijinal metin no: [24a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Seydi b. Durmuş’un biriken ücretlerinin, Köse Musa Bâli’nin terekesinden ödenmesi
Vech-i tezkire oldur ki Seydi b. Durmuş meclis-i şer‘a gelip zevcesi tarafından vekâletin inde’ş-şer‘ isbât ettikden sonra müteveffâ Rüstem’in eytâmına kıbel-i şer‘den vasiyye olan zevcesi olan Şâhî bt. Mustafa nâm avreti ihzâr edip bundan evvel Köse Musa Bâli fevt olup muhallefâtı mezkûr Rüstem’e intikāl ettikde mezkûr Bâli’ye benim müvekkilemin üveği oğlu Seydi b. Musa el-müteveffâ hâl-i hayâtında iken mezkûr Bâli’ye sekiz yıl hizmet edip ücret-i hizmet üzerinde kaldı hâliyâ senden taleb ederim dedikde mezkûre Şâhî akçe kavl olunmuş değil idi heman eğinine başına ve ma‘aşına sarf edip hizmetlerini verdi dedikde mezkûr Seydi ecr-i misil taleb edicek sikāt-i muvahhidînden Ali b. İlyas ve Mustafa Çelebi b. Seralu şehâdet edip mezkûr Bâli zikr olan Seydi’yi sekiz yıl mikdârı hizmetlendi ol asıl hizmetkârı ekal yılda yüz akçeye kabûl ederler dedikleri sebebden yılda yüz akçe ecr-i misil üzere sekiz yüz akçe mezkûr Bâli muhallefâtından zikr olan Seydi’nin anasına ve karındaşlarına hükm olundu. Hurrire fî evâhiri Receb sene 925.
Şuhûdü’l-hâl: Osman b. Gevhertaş, Timurhan b. İsmail, Uğurlu b. Yusuf, Dede b. Udul ve gayruhum
|