|
Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 141 Hüküm no: 210 Orijinal metin no: [24a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Rüstem’in yetimlerinin ev yeri meselesini Şahi bt. Mustafa ile Seydi b. Durmuş’un sulh yolu ile halli
Vech-i tezkire oldur ki Seydi b. Durmuş avreti tarafından bi’l-vekâle meclis-i şer‘a merhûm Rüstem’in eytâmına vasiyye olan zevcesi Şâhî bt. Mustafa ile hâzırân olup mezkûr Seydi’nin avretine ve oğlancıklarına müteveffâ oğlu Seydi’nin ücret-i hizmeti müteveffâ Köse Bâli’nin muhallefâtından ki eytâm-ı mezbûra intikāl etmişdir yılda yüz akçe hesâbı üzere sekiz yüz akçe hükm olundukdan sonra mezkûre Şâhî dahi zikr olan Seydi’ye sen benim yetîmlerimin babalarından intikāl eden bir evlerin bozup hilâf-ı şer‘ aldın deyu nizâ‘ edip mezkûr Seydi müvekkilem oğlu mezkûr Seydi’nin evidir aldım deyip mezkûre Şâhî inkâr edip aralarında envâ‘-ı nizâ‘ vâki‘ oldukda muslih müslümanlar mutavassıtûn olup mezkûre vasiyye Şâhî’nin sulh husûsuna vekîl olan Hüseyin b. Mehmedî elinden gıbbe subûti vekâletihî (…) iki yüz akçe alıverip ve ol nizâ‘ olunan ev damı nizâ‘ından ferâgat ettirip yetîme bu husûsda sulh enfa‘ görüldüğü sebebden bu vech üzere sulh olup mezkûr Seydi dahi bi’l-vekâle sekiz yüz akçe ücret-i hizmet nizâ‘ından vazgelip tarafeynden terk-i da‘vâ ve ibrâ vâki‘ oldukda sıhhat-i sulha hükm olundu ve ittifaken(?) ibrâ vâki‘ oldu. Fî evâhiri Receb sene 925.
Şuhûdü’l-hâl: Dede Ali b. İlyas, Mustafa Çelebi b. Seyrânî, Mustafa b. Abdi, Uğurlu b. Yusuf, Alaaddin b. Hızır, Timurhan b. İsmail
|