Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 215 Hüküm no: 198 Orijinal metin no: [26b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Ermeni Gabril v. Bogos’un Süleyman Çelebi b. Hasan’a buğday bedelinden kalan borcunun ödemesini 101 gün tehîr ettirdiği Ekmekçi tâifesinden Gabril v. Bogos nâm Ermeni mahfil-i kazâda işbu bâ‘isü’r-rakīm Süleyman Çelebi b. Hasan nâm kimesne mahzarında ikrâr ve takrîr-i kelâm edip mezbûr Süleyman Çelebi’ye bundan akdem yedinden iştirâ ve kabz eylediğim keyli beynimizde ma‘lûm buğday bahâsından ba‘de külli’l-hesâb zimmetimde yetmiş beş guruş deynim olup meblağ-ı mezbûrun yirmi guruşunu [27a] kendiye def‘ ü teslîm ol dahi yedimden baʻde’l-kabz hâlâ zimmetimde elli beş guruş deynim bâkī kalmağın meblağ-ı bâkī-i mezbûr elli beş guruşu merkūm Süleyman Çelebi’ye def‘aten edâya iktidârım olmayıp te’cîle tâlib olduğumda meblağ-ı bâkī-i mezbûru târih-i kitâbdan yüz bir gün tamamında tamamen kendiye edâ etmek üzere mezbûr Süleyman Çelebi beni te’cîl etmekle ben dahi ber-vech-i muharrer ecel-i mezkûru baʻde’l-kabûl müddet-i madrûbe hulûlünde meblağ-ı bâkī-i mezbûru merkūm Süleyman Çelebi’ye tamamen edâya ta‘ahhüd eyledim dedikde gıbbe’t-tasdîkı’l-mer‘î mâ-hüve’l-vâki‘ bi’t-taleb ketb olundu. Fî 5 min-Cumâdelûlâ sene 1121 Şuhûdü’l-hâl: Mustafa Çelebi b. Şa‘ban, Ali Çelebi b. İvaz, Ahmed Çelebi b. el-Hâc Ali, Düğmeci Mehmed Çelebi b. Abdullah, Kâtib Ahmed Çelebi, Hasan Çelebi b. Mustafa, Osman Çelebi b. Hasan, Mehmed b. Mehmed ve gayruhum mine’l-huzzâr.