Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 214 Hüküm no: 197 Orijinal metin no: [26b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Abdullah’a borcu olan Mustafa b. Abdullah’ın borcunu havale ettiği Minas v. Kirkor’un parayı Mehmed’e ödemesi Mahmiye-i İstanbul’da Langa kurbünde sâkin işbu bâ‘isü’l-kitâb Mehmed b. Abdullah nâm kimesne meclis-i şer‘-i şerîf-i enverde Minas v. Kirkor nâm zimmî muvâcehesinde üzerine da‘vâ ve takrîr-i kelâm edip bundan akdem gāib ani’l-meclis Mustafa b. Abdullah nâm kimesne zimmetinde cihet-i deyn-i şer‘îden yirmi yedi guruş hakkım olup gāib-i mezbûr Mustafa meblağ-ı mezbûr yirmi yedi guruşu üçümüz bir meclisde iken merkūm Minas’a havâle-i sahîha-i şer‘iyye ile havâle edip her birimiz havâle-i mezbûru kabûl eylediğimizden sonra hâlâ meblağ-ı mezbûru mesfûr Minas’dan taleb eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûr Mehmed’den müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup mahalle-i mezbûrede Kebeciler Hanı’nda sâkin İbrahim b. İsmail ve Kızlarağası Hamamı kurbünde sâkin Mustafa b. Abdi nâm kimesneler li-ecli’ş-şehâde meclis-i şer‘a hâzırân olup istişhâd olundukda fi’l-hakīka müdde‘î-i mezbûr Mehmed b. Abdullah’ın gāib-i mezbûr Mustafa nâm kimesne zimmetinde cihet-i deyn-i şer‘îden yirmi yedi guruş hakkı olup gāib-i mezbûr Mustafa zimmetinde dahi olan meblağ-ı mezbûr yirmi yedi guruşu üçü bir meclisde iken mezbûr Minas’a havâle-i sahîha-i şer‘iyye ile havâle edip her biri minvâl-i muharrer üzere havâle-i mezkûru kabûl eyledi bizler bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince baʻde’l-hükm meblağ-ı mezbûr yirmi yedi guruşu min-ciheti’l-havâle müdde‘î-i mezbûr Mehmed’e edâ ve teslîme mesfûr Minas’a tenbîh olunup mâ-vaka‘a bi’t-taleb ketb olundu. Fî 8 min-Cumâdelûlâ sene 1121 Şuhûdü’l-hâl: Ahmed Çelebi b. Şa‘ban, Ahmed b. Ali, Hasan b. İbrahim, İsmail b. Mustafa ve gayruhum mine’l-huzzâr.