Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 175 Hüküm no: 317 Orijinal metin no: [35a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dellal Mustafa’nın, Hasan b. Hızır Şeyh’e ait çukayı kendisinden habersiz sattığı Vech-i tezkire oldur ki Bundan akdem Dellâl Mustafa nâm kimesne Hasan b. Hızır Şeyh’in bir şahsa çukasını satıverip sonra çukasını satan kimesne gâyib olup çukanın âhar sâhibi çıkıp semeni mezkûr Hasan’dan alıp ba‘dehû Hasan dahî mezkûr Mustafa’yı tutup Mustafa dahî Karaca nâm kimesneyi gâyib olan kimesnenin yatağısız deyu tutup aralarında envâ‘-ı nizâ‘ vâkı‘ olıcak zikr olan Karaca’nın avreti meclis-i şer‘a gelip mezkûr Mustafa’ya yüz akçe bedel-i sulh verip Mustafa dahî alıp yatağısın bul deyu da‘vâsından ferâgat edip ba‘dehû Mustafa dahî zikr olan yüz akçeye seksen akçe dahî zam edip cem‘an yüz seksen akçe edip mezkûr Hasan’a verip Hasan mezbûr dahî alıp çuka husûsunda Mustafa ile olan nizâ‘dan ferâgat edip ehadühümânın (…) da ‘vâsın kalmayıp (…) sicillât olundu. Fî evâil-i Ramazân sene 925 [Şuhûdü’l-hâl]: Kılavuz b. Aslıhan, (…)