Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 181 Hüküm no: 330 Orijinal metin no: [37a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Andorya b. Mihal’in, Ahmed b. Abdullah ile evlenip Müslüman olan Ayşe’nin eşyalarını vermesi Kazıyye oldur ki Ahmed b. Abdullah hâtunı Ayşe’nin vekîlü’ş-şer‘ [îsi] olup şer‘-i şerîf-i Muhammedî ve divân-ı latîf-i kazâ-yı Ahmedî meclisine zimmîlerden Andorya b. Mihal[’i] ihzâr edip şöyle takrîr-i kelâm kılıp dedi ki benim hâtunum Ayşe kâfirî kız iken bana geldikden sonra İslâm’a gelip tasdîk olundukdan sonra bana nikâh olundu hâtunum Ayşe’nin sende cihâzı ve iki kaftanı sende kaldı deyicek mezkûr Andorya mukābel [ede] inkâr edip bende bir habbesi kalmadı deyu inkâr eyledikden sonra mezkûr vekîlü’ş-şer‘ olan Ahmed’den beyyine taleb olundu ba‘de’t-taleb udûl-i müslimînden Sinan b. Abdullah [ve] Ali b. Abdullah edâ-yı şehâdât edip dediler ki zikr olan Hâtun Andorya’dan yeni İslâm’a gelicek kemhası ve ak kaftanı mezkûr Andorya’da kaldı deyu şehâdât eylediklerinden sonra mezkûr Andorya’dan hükm olunup deftere sebt olundu. Tahrîren fî evâhiri Şevvâl min şuhûri sene 925. Şuhûdü’l-hâl: İsa b. Abdullah, Karaca b. Abdullah, Süleyman b. Abdullah, Kılavuz b. Aslıhan