Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 216 Hüküm no: 200 Orijinal metin no: [27a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar Mehmed Subaşı Vakfı’nın mütevellîsi Mehmed Ağa b. Hacı Ömer’in vakfa ait bir çörek fırını ile odanın kiracısı Mehmed Çelebi b. Ramazan’dan sulh yolu ile 20 akçe temessük akçesi tahsil ettiği Ashâb-ı hayrâtdan merhûm Tüccâr Mehmed Subaşı Vakfı mütevellîsi olan Mehmed Ağa b. el-Hâc Ömer mahfil-i kazâda vakf-ı mezbûr musakkafâtından olup mahmiye-i İstanbul’da Kasab İvaz Mahallesi’nde vâki‘ lede’l-ahâlî ve’l-cîrân çörekçi fırını ve odaya icâreteyn-i ma‘lûmeteyn ile mutasarrıf olan işbu râfi‘u’l-kitâb Mehmed Çelebi b. Ramazan nâm kimesne mahzarında ikrâr ve takrîr-i kelâm edip fırın-ı mezkûr ve odayı mezbûr Mehmed Çelebi’nin sulbiye kızı olup bundan esbak vefât eden Âişe Hatun hâl-i sıhhatinde bedel-i ma‘lûm mukābelesinde ferâgat eyledikde taraf-ı vakf-ı şerîfe temessük akçesi şey’-i kalîl vermişidin deyü mezbûr Mehmed Çelebi’den bi’t-tevliye da‘vâya tasaddî eylediğimde beynimizde münâza‘ât-ı kesîre vâkı‘a olmuş idi hâlâ vakf-ı şerîf için dahi bana yirmi guruş verip ben dahi yedinden baʻde’l-ahz ve’l-kabz fırın-ı mezbûra ve odaya müte‘allika bi’t-tevliye kat‘-ı nizâ‘ edip husûs-ı mezkûra müte‘allika aslâ ve kat‘â da‘vâ ve nizâ‘ım yokdur dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 10 min-Cumâdelûlâ sene 1121 Şuhûdü’l-hâl: el-Hâc Mehmed b. Mehmed Câbî-i vakf, Abdullah b. Ali el-Mübâşir, Abdullah b. Süleyman, Mustafa b. Şa‘ban, Ali b. İvaz ve gayruhum mine’l-huzzâr.