Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 216 Hüküm no: 201 Orijinal metin no: [27a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi b. Mehmed’in evini Enderun-ı hümâyûn hazine kethüdâsı Mehmed Ağa b. İvaz’a sattığı Mahmiye-i İstanbul’da Topkapısı kurbünde Fâtıma Sultan Mahallesi’nde sâkin Ahmed Çelebi b. Mehmed nâm kimesne meclis-i şer‘-i şerîf-i enverde hâlâ Enderûn-ı hümâyûn hazîne <> kethüdâsı olan işbu kitâb-ı sıhhat-nisâbın hâfızı umdetü’l-emâcid ve’l-ekârim câmi‘ü’l-mehâmid ve’l-mekârim Mehmed Ağa b. İvaz nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ iki tarafdan yine benim âhar mülküm ve bir tarafdan müşteri-i mûmâ-ileyh mülkü ve bir tarafdan tarîk-i âm ile mahdûd tûlen ve arzen bi-hesâb-ı terbî‘î kırk üç zirâ‘ arsa üzerinde mebnî bir bâb oda ve bir sofa ve tahtında ahır ve iki tarafı taş duvarı muhtevî mülk menzilimi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile müvekkil-i mûmâ-ileyh Mehmed Ağa’ya yüz otuz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr yüz otuz guruşu müvekkil-i müşârun-ileyh yedinden tamamen ahz u kabz eyledim baʻde’l-yevm menzil-i mahdûd-ı mezkûr cemî‘ müştemilâtıyla müvekkil-i müşârun-ileyh Mehmed Ağa’nın mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 10 min-Cumâdelûlâ sene 1121 Şuhûdü’l-hâl: Mefharü’l-hutebâ Abdulkādir Efendi b. Mustafa Ağa, Fahrü’l-a‘yân el-Hâc Mehmed Ağa b. Mehmed Efendi, Umdetü’l-eimme el-Hâc Mehmed Efendi b. Mehmed Efendi, Monla Mustafa b. Mustafa, Mehmed Ağa b. Oruc, Ahmed Ağa b. Mehmed, Hüseyin Çelebi b. Hüseyin, Hüseyin Çelebi b. Hasan el-Muhzır, Türkmen Mehmed Ağa ve gayruhum mine’l-huzzâr.