Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 217 Hüküm no: 202 Orijinal metin no: [27a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Abdullah’ın geçinemediği kocası Mustafa Beşe b. Mehmed’le boşanıp birbirlerinin zimmetlerini ibra ettikleri Mahmiye-i İstanbul’da Kirmasti Mahallesi sâkinelerinden olup zâtı İsmail Efendi b. İbrahim ve es-Seyyid Mustafa b. Mehmed nâm kimesneler ta‘rîfleriyle mu‘arrefe olan Hadice bt. Abdullah nâm hatun mahfil-i kazâda zevc-i dâhili işbu bâ‘isü’l-kitâb Mustafa Beşe b. Mehmed nâm kimesne mahzarında ikrâr ve takrîr-i kelâm edip zevcim mezbûr Mustafa Beşe ile hüsn-i zindegānemiz olmamağla zimmetinde mütekarrer ve ma‘kūdün-aleyh olan sekiz yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mustafa Beşe ile muhâla‘a-i sahîha-i şer‘iyye ile hul‘ olduğumda ol dahi hul‘-ı mezbûru kabûl eylediğinden sonra hukūk-ı zevciyete ve târih-i kitâba gelince beynimizde cereyân eden ahz u i‘tâ ve mu‘âmelât-ı şettâya müte‘allika âmme-i de‘âvî ve mutâlebâtdan ben mezbûr Mustafa’nın zimmetini ibrâ ve iskāt eyledim ve mezbûr Mustafa Beşe dahi kezâlik hukūk-ı zevciyete ve mahalle-i mezbûrede vâki‘ lede’l-ahâlî ma‘lûmü’l-hudûd bana ma‘rifet-i mütevellî ile ferağ ve tefvîz eylediği vakıf menzil bedeline ve gayra müte‘allik âmme-i da‘vâdan benim zimmetimi ibrâ ve iskāt eyledi fîmâ-ba‘d birbirimiz ile kat‘â da‘vâ ve nizâ‘ımız yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 9 min-Cumâdelûlâ sene 1121 Şuhûdü’l-hâl: İmâm İsmail Efendi b. İbrahim, Mehmed Çelebi b. Mustafa el-Müezzin, İvaz b. Abdullah, Mustafa b. Mehmed, Mustafa b. Yusuf, Hasan b. Abdullah ve gayruhum mine’l-huzzâr.