Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 218 Hüküm no: 204 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Yani v. Siro v. Yorgi’nin kiracısı olduğu mahzenin içindeki alet ve eşyaları Yani v. Matolye’ye sattığı <> Bakkāl tâifesinden Yani v. Siro v. Yorgi nâm zimmî tarafından husûs-ı âti’l-beyânı ikrâra vekîl olduğu Yorgi v. İstamo ve Yorgaki v. Dimitri nâm zimmîler şehâdetleriyle şer‘an sâbit olan Yani v. Matolye nâm zimmî meclis-i şer‘-i şerîf-i enverde işbu râfi‘u’s-sifr diğer Yani v. Nikola nâm zimmî muvâcehesinde bi’l-vekâle ikrâr ve takrîr-i kelâm edip Mahmiye-i İstanbul’da Hasır İskelesi’nde vâki‘ İbrahim Ağa mahzeni demekle ma‘rûf ma‘lûmü’l-hudûd mahzen müvekkilim mezbûrun taht-ı icâresinde olmağla mahzen-i mezbûr içinde mevcûde olan eşyâ-i memlûkesinden bir kebîr kazgan ve bir tencere ve beş sahan ve beş sagīr ve kebîr kantar ve bir takım terâzi ve on fıçı ve elli Kuşada destisi ve beş köhne kepçe ve üç yüz vakıyye asel ve otuz vakıyye şîrugan ve on beş vakıyye mum ve kırk vakıyye revgan-ı sâde ve sâir beynlerinde ilm-i şer‘î ile ma‘lûm âlâtını tarafeynden îcâb ve kabûlü hâvî bey‘-i bâtt-ı sahîh-i şer‘î ile târih-i kitâb şehr-i Rebî‘ülâhir’inin on altıncı günü mezbûr diğer Yani zimmîye safka-i vâhide ile yüz yetmiş guruşa bey‘ ve teslîm ol dahi ber-vech-i muharrer iştirâ ve tesellüm ve temellük ve kabz ve kabûl ettiğinden sonra semeni olan meblağ-ı mezbûr yüz yetmiş guruşu târih-i mezbûrda müvekkilim mezbûr diğer Yani zimmî yedinden tamamen ahz u kabz eylemişidi baʻde’l-yevm zikr olunan mahzende mevcûde olan eşyâ-i muharrere-i mezkûre müşteri-i mezbûr diğer Yani’nin mülk-i müşterâsı ve hakk-ı sırfı olup müvekkilim mezbûrun kat‘â alâkası yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 9 min-Cumâdelûlâ sene 1121 Şuhûdü’l-hâl: Mehmed Çelebi b. Ahmed, Mustafa Çelebi b. Ahmed, Mustafa Çelebi b. Şa‘ban, Ali Çelebi b. İvaz, Abdullah Çelebi b. Mustafa el-Muhzır ve gayruhum mine’l-huzzâr. Yani v. Havyarcı, Nikola v. Parsih, İstemat v. Nikola, Yorgi v. Yani, Kostantin v. Havyarcı