Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 219 Hüküm no: 205 Orijinal metin no: [27b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Başka diyarda bulunan Mustafa b. Lütfullah’ın hanımı Ayşe bt. Yusuf’a nafaka tayini Mahmiye-i İstanbul’da Karagümrük kurbünde Ali Paşa-yı Atîk Mahallesi sâkinelerinden olup zâtı ta‘rîf-i şer‘iyye ile mu‘arrefe olan işbu râfi‘atü’l-kitâb Âişe bt. Yusuf nâm hatun meclis-i şer‘-i şerîfde takrîr-i kelâm edip bundan akdem zevcim gāib ani’l-meclis Mustafa b. Lütfullah beni bilâ-nafaka bırakıp diyâr-ı âhara gitmekle nafaka ve kisveye zarûret ve ihtiyâcım olmağın zevcim gāib-i mezbûr üzerine kıbel-i şer‘den kadr-i ma‘rûf nafaka farz ve takdîr olunmak <> murâdımdır dedikde ba‘de’t-tahlîfü’ş-şer‘î hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri mezbûre Ayşe’ye nafaka ve kisve-bahâsıʼçün beher yevm zevci gāib-i mezbûr üzerine yedişer akçe farz ve takdîr edip meblağ-ı mefrûz-ı mezkûru harc u sarfa ve hîn-i zarûretde istidâneye ve lede’z-zafer gāib-i mezbûr üzerine rücû‘a mezbûre Âişe’ye izin vermeğin mâ-vaka‘a bi’t-taleb ketb olundu. Fî 10 min-Cumâdelûlâ sene 1121 Şuhûdü’l-hâl: Ahmed b. Ali, Ali b. el-Hâc Hasan, Mehmed Beşe b. Salih, Süleyman b. el-Hâc Halil, Mustafa b. Mehmed, Musa b. Osman, İsmail b. Mehmed, Mustafa b. Mehmed, İbrahim Çelebi b. Abdullah, Mustafa Çelebi b. Şa‘ban, Ali Çelebi b. İvaz, Süleyman b. Abdullah ve gayruhum mine’l-huzzâr.