Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 236 Hüküm no: 449 Orijinal metin no: [53b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ramazan b. Süleyman’ın, Kasım b. Abdullah’ın alacak davasından beraat etmesi Vech-i tezkiretü’l-hurûf oldur ki Kazâ-yı İznikmid’de karye-i Kazıklı’da mütemekkin olan Kasım b. Abdullah şer‘-i şerîf-i Muhammedî meclisine Ramazan b. Süleyman[’ı] ihzâr edip şöyle takrîr-i da‘vâ kılıp dedi ki sende karz-ı hasenden sana hizmetim ücretinden dokuz yüz akçem vardır taleb ederim deyicek mezkûr Ramazan mukābel[e] de cevâb verip dedi ki on altı ay hizmetin ücretinden altı yüz yirmi düyûnum olup sana teslîm eyledim deyicek teslîmine beyyine taleb olundu ba‘de’t-taleb udûl-i müslimînden Veli b. Davud [ve] Yusuf b. Halil [ve] Karagöz b. Abdullah mezkûr Kasım’ın üç [yüz] akçesin aldım deyu ikrâr eyledi deyu şehâdât eylediklerinden sonra meblağ-ı mezkûrun üç yüz yirmi akçesi mezbûr Kasım’a teslîm edip bâkīsine yemîn müteveccih olup yemîn billâh eylediğinden sonra mezkûr Ramazan’ın bu husûsda berâatına hükm olunup deftere sebt olundu. Tahrîren fî evâsıtı Rebî‘ilevvel min şuhûri sene 926. Şuhûdü’l-hâl: Süleyman b. Ayvaz, Ebubekir b. Mustafa, Mustafa b. Muhammed, Ramazan b. Karagöz, Timurhan b. İsmail ve Kılavuz b. Aslıhan ve gayruhum