Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 237 Hüküm no: 450 Orijinal metin no: [53b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Yani b. Varelyo’nun tasarrufundaki bostanın Andronikoz b. Matyos’a verilmesi Vech-i tezkiretü’l-hurûf oldur ki Andronikoz b. Matyos şer‘-i şerîf-i Muhammedî ve dîvân-ı latîf-i Ahmedî meclisine Yorgi b. Varelyo[’yu] ihzâr edip şöyle takrîr-i da‘vâ kılıp dedi ki karındaşın Yani fevt olup (…) mezkûr müteveffânın tasarruf ede geldiği bir kıt‘a bostan ki hadd-i kıblîsi tarîk-i âmamüntehîdir ve hadd-i şarkîsi Marula bağına mülâbisdir ve hadd-i şimalîsi ırmağa mülâsıkdır ve hadd-i garbîsi Yorgi mezkûr bostanına muttasıldır bu hudûd-ı erba‘a içinde olan bir kıt‘a yer ki mahlûldur deyicek Yorgi b. Manol Varelyo mukābelede cevâb verip dedi ki zikrolan bostan ki içinde bir dolabı ve bir kuyusu ve bir kiraz ağacı ve bir zerdâli ağacı olup mülktür bana karındaşım Yani’den mülk olup bana hisse-i irsle intikāl eyledi deyicek Müftü Ali Çelebi fetvâsı mûcebince bu bostanlık tarîk ile tasarruf olagelen bir kıt‘a yer ki karye-i Çengel’e âmil olan Andronikoz Hüdâvendigâr için hükm olunup deftere sebt olundu. Tahrîren fî 18 Rebî‘ilevvel min şuhûri sene 926. Şuhûdü’l-hâl: Todora b. (…), Dimitri b. Ulah, Hızır b. (…), Karaca b. Pîri, Timurhan b. İsmail, Yorgi Papas, Gora b. Demirci ve gayruhum