Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 298 Hüküm no: 568 Orijinal metin no: [73a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Şahin ile İskender b. Abdullah’ın koyun bakım sözleşmesi Kazıyye Vech-i tezkire oldur ki Ali b. Şahin meclis-i şer‘a İskender b. Abdullah ile bile hâzırân olup mezkûr Ali şöyle ikrâr ve i‘tirâf eyledi ki mezkûr İskender yüz elli koyun verdim mezkûr yüz elli koyunun kıymetine beş bin sekiz yüz akçedir üç yıla değin güde [ve] tımar ede mezkûr yüz elli koyunun bahâsını tamâm hâsıl ola üç yıla değin üç yıldan sonra koyunun nısfı benim nısfı onun ola iştirâk üzerine olavuz ama mezkûr beş bin sekiz yüz akçenin dört yüz akçesin bana teslîm etti ben dahi dört yüz akçesinden vazgeldim bâkī beş bin akçe kaldı mezkûr beş bin akçeyi üç yıla değin ödeye ondan sonra koyunu müşterek olavuz nısfı anın nısfı benim ola deyicek mezkûr İskender dahi bi’l-muvâcehe tasdîk edip talebleriyle sicil[e] kayd olundu. Cerâ zâlike ve hurrire fî evvel-i Cemâziyelâhir sene sitte ve ışrîn ve tis‘a-mi’e. Şuhûdü’l-hâl: Mürüvvet b. Mehmed ve Ahmed b. Hüseyin ve Mustafa b. Abdullah ve Timurhan b. İsmail ve Hacı b. Abdullah Yeniçeri