Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 340 Hüküm no: 679 Orijinal metin no: [87a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gebze kadısına ulak emrini kaldırması için gönderilen ferman sureti [Hâzihî] (...) sûretü’l-hükmi’s-sultânî [Akdâ] kudât ve’l-hükkâm ma‘denü’l-fazlü ve’l-kelâm Mevlânâ Gekvize kadısı -dâme fazluhû- tevkî‘-i refî‘-i hümâyûn vâsıl olıcak ma‘lûm ola ki ulak emri ahâlî-i memlekete ziyâde tazyîk ve zahmet olup nice kimesnelerin davarları helâk ve zâyi‘ olmağın kemâl-i ma‘delet-i şâhânemden [ulak] zahmetin ref‘ edip bu husûsıçün Dergâh-ı mu‘allâm çavuşlarından dârende-i fermân-ı âlî-şânım kıdvetü’l-emâsil ve’l-akrân çavuş Murad -zîde kadrühû- ile Üsküdar’dan Beştaş’a varınca ulak için [o]n sekiz re’s bârgîr irsâl olunup buyurdum ki sen bizzat mübâşeret edip zikr olan bargirlerden üç re’sini Üsküdar’da ve üç re’sini Gekvize’de ve üç re’sini Dil’in öte yakasında Ahmed Paşa köyünde ve üç re’sini İznik’de ve üç re’sini Lefke’de ve üç re’sini Beştaş’da koyup ulak için ta‘yîn edesiz ve mezkûr bargirleri yedmek için menzil kifâyet kadarı âdem çıkarıp yettirip ta‘yîn olunan mahallere îsâl edesiz ve zikr olunan bargirlerin otluğunu ve arpasını ve sâir havâyicini kendi yanlarından tedârük etmek için ol bargirler konulan nevâhîden ellişer nefer kimesneyi ol hizmet mukābelesinde külli avârızdan mu‘âf ve müsellem olmak üzere ta‘yîn edip ve her yerde ta‘yîn olunan ellişer nefer kimesnelerin isimlerin ve şöhretlerin ve sâkin oldukları yerlerin mufassal defter edip müşârun-ileyh kulum ile kapıma gönderesiz ve ulağa binen kimesneler dahi bir menzilden tecâvüz eylemeyeler ve ulak bargir bırakıldığı menzilin âdemleri menzil-i sâbıkın âdemîsi gelince gereği gibi timâr eyleyeler, te’cîlât (?) olmaya şöyle taksirlik edeler ve i‘lâm oluna anlara tazmîn oluna şöyle ki biline alâmet-i şerîfe i‘timâd kılına. Tahrîren fî evâsıtı şehri Muharremi’l-harâm sene seb‘a ve ışrîn ve tis‘a-mi’e. Be makām-ı Kostantiniye.