Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 341 Hüküm no: 682 Orijinal metin no: [87b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ramazan b. İskender’in, Resul b. Atmaca’ya ait yeri iade etmesi Kazıyye Vech-i tahrîr oldur ki Resul b. Atmaca meclis-i şer‘a hâzır gelip bilesince Ramazan b. İskender’i ihzâr edip üzerine şöyle takrîr-i merâm kılıp dedi ki sen mutasarrıf olduğun bir pâre yer ki İstanbul müdüyle tahmînen buçuk müdlüktür mahdûddur bir haddi ricâli Terzi b. Kara Yegan yerine muttasıldır ve bir haddi Resul b. Atmaca yerine muttasıldır ve İvaz ve Mustafa binâ-i Ömer aralarında müşterek olan yere ve Değirmen Deresi demekle ma‘rûf dereye ve büyük pelite ve tarîk-i âma mülâsık işbu hudûd-ı erba‘a içinde olan yer benim taht-ı tasarrufumdan aktarılmış yerim iken hisâr eri Yunus’dan göndür deyu senin baban İskender iki buçuk yıl mikdârı vardır tapuya almış mezkûr baban İskender öldü el-ân senin elindedir taleb ederim deyicek mezkûr Ramazan inkâr eyledi gıbbe’l-inkâr mezbûr Resul’ün da‘vâsına muvâfık beyyine taleb olundukda udûl-i müslimînden Minnet Kethüdâ b. Gayb ve Mürsel b. Durmuş hâzırân olup dediler ki biz şâhidleriz şehâdet dahi ederiz mezkûr mahdûd olan yeri mezkûr müteveffâ İskender tapuya aldığı zamânda mezbûr Resul’ün tasarrufunda aktarılmış yeriydi deyu ol bâ‘isden merkūm mahdûd yer mesfûr Resul’e hükm olunup deftere sebt olundu. Tahrîren fî evâhiri Muharrem sene 927. Şuhûdü’l-hâl: (…) b. (…) ve Musa Halife b. Fazlı ve Eyüb Bey b. Süleyman ve Mahmud Fakih b. İshak ve gayruhum