Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 361 Hüküm no: 726 Orijinal metin no: [95a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Turahan’ın Pendik halkı tarafından hapsedildiği (...) silahdarlar zümresinden Turahan gulâm-ı şâhî kazâ-yı Gekvize(...) Pendik nâm karye halkını meclis-i şer‘a ihzâr edip ve dün gün Mısır [seferinden] gelirken er ve avret üşe gelip beni bi hilâfı şer‘ muhkem let edip bukağıya urup sefer-i pâdişâhîye giderken ber vech-i habs (…) eylediniz dedikde mezbûrûn karye ahâlîsi bi’l-inkâr cevâb vericek udûl-i müslimînden Kemal Bey b. Abdullah es-Silâhî ve Hamza b. Osman ve Nasuh b. Bedr ve Süleyman b. Ayas ve Halil b. Ahmed nâm kimesneler hâzırûn olup işbu müşârun-ileyhim karye ahâlîsi işbu Turahan nâm gulâm-ı şâhî üşe gelip er ve avret muhkem let eylediklerinden bukağıya urup bir gece muhkem habs edip te‘addî eylediler deyu şehâdet ettiklerinden sonra şehâdetleri ba‘de’t-ta‘dîl ve’t-tahlîf hayyiz-i kabûlde vâki‘ olup sebt-i sicil olundu. Tahrîren fî evâsıtı şehri evveli’l-Cumâdeyn sene 927. Şuhûdü’l-hâl: Timurhan b. İsmail ve Şâdi b. Abdullah ve Mustafa b. Abdullah ve Hamza b. Abdullah ve Yusuf b. Abdullah ve Yusuf b. Terzi [ve] Alagöz b. Abdullah ve Budak b. Davud ve Mustafa b. Mahmud ve Memi b. Şaban ve gayruhum