Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 247 Hüküm no: 243 Orijinal metin no: [32a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Paris v. Nikola’nın firar eden Dominko v. Fontana’da olan alacağını kefil olduğu iddiasıyla Tercüman Kornati v. Can Batista’ya açtığı kefalet davasından vazgeçtiği Kürkçü tâifesinden olup mahrûse-i Galata’da Sultan Bayezid Mahallesi’nde sâkin Paris v. Nikola nâm zimmî meclis-i şer‘-i hatîrde Tercümân Kornati v. Can Batista nâm Nasrânî muvâcehesinde ikrâr ve takrîr-i kelâm edip gāib ani’l-meclis Dominko v. Fontani nâm zimmî zimmetinde yedimden müşterâ ve makbûz vasfı beynimizde ma‘lûm kürk semeninden sekiz yüz doksan beş guruş hakkım olup meblağ-ı mezbûra merkūm Kornati Tercümân kefîl olmuş idi deyü meblağ-ı mezbûru merkūm Kornati’den taleb ve da‘vâ etmişidim lâkin merkūm Kornati Tercümân meblağ-ı mezbûra ber-vech-i muharrer kefîl olmuş idi deyü da‘vâmda mübtil ve kâfiri olup merkūm Kornati’nin gerek mezbûr Dominko’ya ve gerek babası mezbûr Fontana’ya kat‘â kefâleti olmayıp husûs-ı mezbûra müte‘allika âmme-i de‘âvîden mesfûr Kornati’nin zimmetini ibrâ-i âmm-ı râfi‘u’l-hısâm ile ibrâ ve iskāt eyledim min-ba‘d mezbûr Kornati ile kefâlet-i mezbûreye müte‘allika aslâ da‘vâ ve nizâ‘ ve husûmetim yokdur dedikde gıbbe’t-tasdîkı’l-vicâhî mâ-vaka‘a bi’t-taleb ketb olundu. Fî 18 min-Cumâdelûlâ sene 1121 Şuhûdü’l-hâl: Ahmed Çavuş b. Mehmed, el-Hâc Yusuf b. Abdurrahman, el-Hâc Hüseyin b. Abdullah Çukadâr, Mustafa Çelebi b. Abdullah, Mehmed Çelebi b. Abdi, Abdullah Çelebi b. İvaz ve gayruhum mine’l-huzzâr.