Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 246 Hüküm no: 242 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Ömer, Mehmed b. Şa‘ban ve İbrahim Efendi b. Ali Efendi’nin Urgankiriş köyündeki tarlalarından öşür ve vergi talep eden Mahmud Efendi b. Mustafa’nın bu müdahalesinin menedildiği Vilâyet-i Kastamonu sancağında Sâhil kazâsına tâbi‘ Urgankiriş nâm karye re‘âyâlarından ashâb-ı hâzihi’l-vesîka Ahmed b. Ömer ve Mehmed b. Şa‘ban ile İbrahim Efendi b. Ali Efendi nâm kimesneler dîvân-ı hazret-i [sadr]âzamîde ma‘kūd mahfil-i kazâda Dirilten? tekyesine [bâ] berât-ı âlî-şân mutasarrıf olan Mahmud Efendi b. Mustafa nâm kimesne mahzarında her biri takrîr-i da‘vâ ve tasvîr-i müdde‘â edip karye-i mezbûrede vâki‘ eben an-ceddin her birimiz tasarrufumuz olan lede’l-ahâlî ma‘lûmü’l-hudûd ve’l-kıt‘a tarlalarımızın öşür ve resmini sâ[hib-i] arza edâ edegelip âhardan kimesne ta‘arruz edegelmiş değil iken mezbûr Mahmud Efendi benim mutasarrıf olduğum tekye-i mezbûre evkāfındandır deyü zikr olunan tarlalarımıza müdâhale ve bi-gayr-ı vech öşür ve resm talebiyle rencîdeden hâlî olmayıp ve kendinden sûret-i defter-i hâkānî taleb olundukda defter-i hâkānîde kaydı dahi olmamağın suâl olunup bî-vech meşrûh üzere müdâhaleden men‘ olunmak matlûbumuzdur dediklerinde gıbbe’s-suâl mezbûr Mahmud Efendi cevâbında tekye-i mezbûrda ve mezbûrların müdde‘âsı olan tarlalarda kat‘â alâka ve medhalim olmayıp ve min-ba‘d ta‘arruz etmem demekle i‘tirâfı mûcebince baʻde’l-yevm mezbûrların tarlalarına müdâhale etmeyip öşür ve resm talebiyle rencîde etmemek üzere mezbûr Mahmud Efendi’ye tenbîh-birle mâ-vaka‘a bi’t-taleb ketb olundu. Fi’l-yevmi’s-sânî aşer min-Cumâdelûlâ li-sene 1121 Şuhûdü’l-hâl: el-Hâc Mustafa Efendi tâbi‘-i efendi, Ebûbekir Efendi Nâib-i ayak, el-Hâc Hüseyin Beşe Çukadâr, Mehmed Çelebi b. Abdullah ve gayruhum mine’l-huzzâr.