Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 249 Hüküm no: 247 Orijinal metin no: [32b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Bey b. Ömer ve Ahmed Bey b. Ömer’in Ali Bey b. Mehmed’e açtıkları zarar-ziyan davasında beş guruşa sulh oldukları Vilâyet-i Anadolu’da Çerkeş kazâsına tâbi‘ Çömlekçi nâm karye ahâlîsinden olup hâlâ Mahmiye-i İstanbul’da müsâfiren sâkin İbrahim Bey b. Ömer ve Ahmed Bey b. Ömer nâm kimesneler meclis-i şer‘-i şerîf-i enverde Ali Bey b. Mehmed nâm kimesne mahzarında ikrâr ve takrîr-i kelâm edip mezbûr Ali Bey bundan akdem vilâyetimizde kara? beytülmâlı emîni iken bir gece elli aded tevâbi‘iyle karyemize gelip bârgirlerine birer yem verdiğimizden mâ‘adâ bi-gayr-ı hakkın her birimize ikişer yüz değnek urup ve beynimizde ma‘lûm baʻzı eşyâmız dahi zâyi‘ oldu deyü hâlâ mûceb-i şer‘îsini da‘vâ eylediğimizde ol dahi inkâr eylediğinden mâ‘adâ siz benim kırk beş guruş nakd akçem ile bir sim hançerimi ahz eylediniz deyü bizden da‘vâ etmekle beynimizde nizâ‘-ı küllî vâki‘ olmuş idi el-hâletü hâzihî mezbûr Ali Bey zikr olunan elli aded yemîn bahâsı olmak üzere bize beş guruş def‘ ü teslîm biz dahi yedinden ahz u kabz edip husûs-ı mezbûra müte‘allika âmme-i de‘âvîden her birimiz âharın zimmetini ibrâ ve iskāt eyledik min-ba‘d birbirimiz ile aslâ da‘vâ ve nizâ‘ımız yokdur dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 9 min-şehri Rebîʻülâhir sene 1121 Şuhûdü’l-hâl: Murad Efendi b. el-Hâc Şa‘ban, Mehmed Efendi b. Mehmed, Halil Efendi b. İbrahim, Mehmed Bey b. ( ) ve gayruhum mine’l-huzzâr.