Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 248 Hüküm no: 246 Orijinal metin no: [32a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Çelebi b. Ali’nin alacaklısı olduğu İbrahim Çelebi b. Halil’den sulh yoluyla on beş guruş alarak zimmetini ibra ettiği Mahmiye-i İstanbul’da Ca‘fer Subaşı Mahallesi’nde sâkin Süleyman Çelebi b. Ali nâm kimesne mahfil-i kazâda işbu râfi‘u’l-vesîka İbrahim Çelebi b. Halil nâm kimesne mahzarında ikrâr ve takrîr-i kelâm edip mezbûr İbrahim Çelebi’ye kendi mâlımdan [yirmi] beş guruşumu ikrâz ve teslîm ol dahi yedimden iktirâz ve kabz ve tesellüm ve kendi mesârifine sarfla istihlâk ettiğinden sonra meblağ-ı mezbûru mezbûr İbrahim Çelebi’den taleb ve da‘vâ sadedinde olduğumda beynimizde münâza‘ât-ı kesîre ve muhâsamât-ı ekîde vâkı‘a olmuş idi el-hâletü hâzihî beynimize muslihûn tavassut edip da‘vâ-yı mezkûremden mezbûr İbrahim Çelebi ile beni on beş guruş üzerine sulh eylediklerinde ben dahi ber-vech-i muharrer sulh-ı mezbûru kabûl ve bedel-i sulh olan meblağ-ı mezbûr on beş guruşu mezbûr İbrahim Çelebi yedinden tamamen ahz u kabz edip bâkī kalan on guruş mutâlebesine ve sâir beynimizde cârî olan ahz u i‘tâ ve mu‘âmelât-ı şettâya müte‘allika âmme-i da‘vâdan her birimiz âharın [32b] zimmetini ibrâ ve iskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 18 min-Cumâdelûlâ sene 1121 Şuhûdü’l-hâl: Ali b. İvaz, Abdullah b. Abdullah, Hasan b. Mustafa, Ali b. Bâli ve gayruhum mine’l-huzzâr.