Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 250 Hüküm no: 249 Orijinal metin no: [32b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Abdullah’ın vârislerinden Fâtıma bt. Mehmed’in tereke eşyasındaki hissesini Rukiye’nin kızı Ümmügülsüm’e satıp zimmetini ibra ettiği Mahmiye-i İstanbul’da Hoca Üveys Mahallesi’nde sâkine iken bundan akdem vefât eden Rukiye bt. Abdullah nâm hatunun verâseti [zevci] İbrahim b. Şa‘ban nâm kimesne ile sadriye sagīre kızı Ümmügülsüm ile mezbûreyi i‘tâk edip usûbet-i nesebiye cihetinden Fâtıma bt. Mehmed nâm hatuna münhasıra ve tashîh-i mes’eleleri dört sehmden olup sihâm-ı mezbûreden bir sehmi zevci mezbûra ve iki sehmi kızı merkūmeye ve bir sehmi mevlâsı mezbûre Fâtıma’ya isâbet ve intikāl eylediği şer‘an zâhir ve mütehakkık oldukdan sonra zâtı İbrahim Çelebi b. Mustafa ve Abdurrahman Çelebi b. Ahmed ta‘rîfleriyle mu‘arrefe olan mezbûre Fâtıma mahfil-i kazâda sagīre-i mezbûrenin babası ve velîsi işbu râfi‘u’l-kitâb mezbûr İbrahim Çelebi mahzarında bi’l-verâse ikrâr ve takrîr-i kelâm edip mûrisim müteveffât-ı mezbûrenin eşyâ-yı memlûkesinden bir çift altın bilezik ve bir çift la‘l küpe ve bir mücevher kuşak ve bir sim kuşak ve on sahan ve dört tencere ve iki sini ve dört mak‘ad ve iki yorgan ve yedi minder ve bir orta keçesi ve iki döşekde tashîh-i mezkûr üzere benim hisseme isâbet eden bir sehm-i şâyi‘imi tarafeynden îcâb ve kabûlü hâvî bey‘-i kat‘î ile sagīre-i mezbûreye yüz elli guruşa bey‘ ve temlîk eylediğimde babası mezbûr dahi sagīre-i mezbûre için bi’l-velâye iştirâ ve temellük ve kabz ve kabûl eylediğinden sonra semeni olan meblağ-ı mezbûr yüz elli guruşdan sagīre-i mezbûrenin ve babasının zimmetlerini ibrâ-i âm ile ibrâ ve iskāt eyledim baʻde’l-yevm eşyâ-i muharrere-i mezbûre sagīre-i merkūmenin mülk-i müşterâsıdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 19 min-Cumâdelûlâ sene 1121 Şuhûdü’l-hâl: İmâm Mehmed Efendi b. Musa, es-Seyyid Süleyman Çelebi b. es-Seyyid Hasan, Mustafa Efendi b. Şa‘ban, Müezzin Mehmed b. Mehmed, Ömer b. Ahmed ve gayruhum mine’l-huzzâr.