Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 251 Hüküm no: 250 Orijinal metin no: [32b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun bt. Mehmedʼin Çıkrıkçı Kemal Mahallesi’ndeki menzilini Seyyid Süleyman Efendi b. Seyyid Hasan Efendi’ye satıp zimmetini ibra ettiği Mahmiye-i İstanbul’da Çıkrıkçı Kemal Mahallesi sâkinelerinden olup zâtını ma‘rifet-i şer‘iyye ile ârifân mahalle-i mezbûre imâmı Mehmed Efendi b. Musa ve İbrahim Çelebi b. Mustafa ta‘rîfleriyle mu‘arrefe olan Fâtıma Hatun bt. Mehmed meclis-i şer‘-i şerîf-i enverde kız karındaşı oğlu işbu hâfızü’l-kitâb es-Seyyid Süleyman Efendi b. el-merhûm es-Seyyid Hasan Efendi mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Esirci Şuhi nâm hatun mülkü ve iki tarafdan yine benim âhar mülküm ve bir tarafdan tarîk-i âm ile mahdûd olup tûlen ve arzen bi-hesâb-ı terbî‘î iki yüz yetmiş zirâ‘ arsa üzerinde mebnî bir bâb çamlı köşk ve bir mikdâr dehlîz ve bir tahta-pûş ve bir havuz ve bir kuyu ve bir sagīr zîr-i zemîn mahzen ve bir mikdâr bahçeyi müştemil ve dâhiliye tâʻbir olunur mülk menzilimi cümle tevâbi‘ ve levâhıkı ile tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile merkūm es-Seyyid Süleyman Efendi’ye beş yüz guruşa bey‘ ve temlîk ve teslîm ol dahi vech-i muharrer üzere iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr beş yüz guruş mutâlebesinden merkūm es-Seyyid Süleyman Efendi’nin zimmetini ibrâ-i âmm-ı kātı‘u’n-nizâ‘la ibrâ ve iskāt eyledim baʻde’l-yevm arsa-yı mahdûde-i mezbûre üzerinde olan köşk ve dehlîz ve tahta-pûş ve havuz ve kuyu ve mahzen ve bahçede kat‘â alâka ve medhalim kalmayıp mezbûr es-Seyyid Süleyman Efendi’nin mülk ve hakkı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 19 min-Cumâdelûlâ sene 1121 Şuhûdü’l-hâl: Mehmed Efendi b. Musa el-İmâm, Çorbacı Mehmed Ağa, Hoca Mehmed Efendi, Mustafa Efendi Kasabzâde, Ebûbekir Çelebi b. Ahmed, Fahrü’l-kuzât Süleyman Efendi, el-Hâc Osman b. el-Hâc Süleyman, Mehmed Çelebi Ramazanzâde, Abdurrahman Çelebi b. el-Hâc Ahmed, Bakkāl Abdurrahman Çelebi, Ahmed Çelebi b. Mustafa, Kasım Efendi b. Musa ve gayruhum mine’l-huzzâr.