Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 472 Hüküm no: 881 Orijinal metin no: [125b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Asiye bt. İshak’ın ev aldığı [Sebeb-i tahrîr-i hurûf oldur ki] Mahrûse-i İstanbul’da merhûm ve mağfûrun-leh Sultân (...) aleyhir’r-rahmetü ve’l-gufrân imâretinde nakîb olan (...) aleyhi efdalü’s-salevât ve ekmelü’t-tahiyyât hâzır gelip (...) dan Asiye bt. İshak[’ı] ihzâr edip mezkûr takrîr-i merâm ve tebyîn-i kelâm kılıp eyitti ki benim (...) ve bintüm Ümmi’nin İmâret mahallesinde min mahallâtı kasaba-i mezbûrede vâlidelerinden bi tarîki’l-irs müntakil olmuş bir çatma evleri hudûd kıbleten tarîk-i âma muttasıldır ve şarken Hatîb vakfı olan bağa muttasıldır ve şimâlen Hüseyin b. Ali bağına muttasıldır ve garben Eskici yerine muttasıldır bu hudûd-ı erba‘a ile mahdûd olan evi tevâbi‘ ve levâhıkıyla harâba müteveccih olup yetîmlere zarar olduğu sebebden bey‘-i men yezîd edip mezbûre Asiye’ye iki bin iki yüz râyicü’l-vakt akçeye bey‘ ettim meblağ-ı mezkûru dahi bî-kusûr kabz ettim min ba‘d mutasarrıf ola hiç kimesne mâni‘ ve dâfi‘ olmaya deyu ikrâr ve i‘tirâf eyledi mezkûre Asiye mukırr-ı mezbûru kavlinden bi’l-muvâcehe tasdîk eyleyip talebiyle bu deftere sebt ve sicil olundu. Tahrîren fî evâhiri Recebi’l-mürecceb sene seb‘a ve ışrîn ve tis‘a-mi’e. Şuhûdü’l-hâl: Hoca Mehmed b. Veli Elhâc ve Kılavuz b. Aslıhan ve Kabil b. Abdullah ve Eskici b. Ramazan ve Ferhad b. Abdullah ve gayruhum mine’l-müslimîne’l-hâzırîn ve’n-nâzırîn