Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 76 Hüküm no: 76 Orijinal metin no: [9a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bosna asıllı yeniçerinin vebadan ölmesi Vech-i tezkiretü’l-hurûf budur ki Evrenos b. Yahşi meclis-i şer‘de nahiye-i Üsküdar’da acemi yeniçeriler kethudâsı olan Yeniçeri Hacı b. Abdullah mahzarında takrîr-i müdde‘â kılıp eyitti ki, bundan esbak hızmetimde olan Ahmed nâm emred eşhelü’l-ayneyn asferü’l-levn mu‘tedilü’l-kāme Bosnaviyyü’l-asl acemi yeniçeri maraz-ı tâ‘ûna mübtelâ olup müteveffâ oldu, dedikde gıbbe’l-istişhâd udûl-i müslimînden İsa b. Mehmed ve Nazar b. Hasan ve Mustafa b. Mehmed ve Ali b. Ahmed ve Ali b. Abdullah el-hür ve Şahbâli b. Ahmed bi-esrihim ileri gelip edâ-i şehâdet edip vech-i meşrûh üzere zikr olunan Ahmed nâm acemi yeniçeri oğlanı mezbûr maraza mübtelâ olup müteveffâ oldu, biz defninde bile hâzır idik, dediklerinde gıbbe’t-tezkiye hayyiz-i kabûlde vâkı‘ olup talebiyle deftere sebt olundu. Tahrîren [fî] târihi’l-mez[bûr] gurreti’l-mez[kûr]. Şuhûdü’l-hâl: Mezkûrlar.