Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 116 Hüküm no: 200 Orijinal metin no: [20b-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Murad’ın Yeniçeri Ali b. Abdullah’tan koyunlarını geri alması Vech-i tahrîr-i hurûf budur ki Karye-i Reisli’den Hüseyin b. Murad şer‘-i şerîf meclisinde takrîr-i merâm kılıp eyitti ki, karye-i mezbûreden Yeniçeri Ali b. Abdullah mahzarında şöyle edâ-i kelimât kılıp eyitti ki, sâbıkan iki yüz otuz baş ganem bey‘ eyledim idi, şimdi akçesin taleb ederin, dedikde mezkûr Abdullah dahi el-ân akçesin edâsına kādir değilin, geri ganem[ler]in sana teslîm edeyin, dedikde mezkûr Hüseyin dahi bilâ ikrâh ve’l-icbâr aldım, kabûl eyledim, dedikde tarafeynden teslîm ve tesellüm bulunup min ba‘d bahâ-i ganemden ve gayrıdan da‘vâmız ve nizâ‘ımız olmaya ve illâ ınde’l-hukkâm nâ-mesmû‘ ola, deyicek talebleriyle tarafeynin ikrârları sebt-i sicil olundu. Tahrîren fî evâhıri âhıri’l-Cumâdeyn sene 931. Şuhûdü’l-hâl: Hacı Hüseyin b. Ahmed, Kulağuz b. Aslıhan, Aslıhan b. Durahan, Cafer b. Süleyman, Abdi b. ve gayruhüm.