Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 116 Hüküm no: 201 Orijinal metin no: [21a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Üsküdar iskelesinin iltizamının Ahmed’e verilmesi İftihâru’l-kudât ve’l-hukkâm, ma‘denü’l-fazli ve’l-kelâm Mevlâna Gekvize kadısı -zîde-fazluhû- tezkire varıcak ma‘lûm ola ki, bundan akdem nefs-i Üsküdar’ın iskelesin ve sâir mîrîye müteveccih olan mahsûlâtın bi’l-fi‘l emîni olan Timurhan üç yılda ellibeş bin akçe hâsıl göstermeyi iltizâm etmişdi. Hâliyâ gulâm-ı şâhî Ahmed gelip zikr olan emânet bana sadaka olunursa ibtidâ-i tahvîlden beş bin akçe ziyâde edip üç yılda altmış bin akçe hâsıl göstermeyi mültezim oldu. İmdi te’hîr etmeyip emîn-i sâbık Timurhan’ı müfredâtı defterleri ile getirtip ibtidâ-i mübâşeretinden ilâ yevminâ hâzâ âdet ve kānûn üzere müfredâtdan onat vechile hesâbın görüp tamâm olduktan sonra muhâsebesin yazdırıp nişanlayıp ve mühürleyip mevcûd akçeyi ve muhâsebeyi mezbûrân Ahmed ve Timurhan ile dergâh-ı mu‘âllâya gönderesin hîn-i hesâbda ihtimâm edip dakīka fevt etmeyesin. Tahrîren fî 27 Cemâziyelevvel sene ihdâ ve selâsîne ve tis‘a mi’e.