Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 186 Hüküm no: 266 Orijinal metin no: [36b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Luka b. Nikola’nın, Emir b. Mustafa’ya borcunun vasî Todora tarafından ödenmesi Kazıyye budur ki Karye-i Çengel’den Luka b. Nikola müteveffâ olup Emir b. Mustafa meclis-i şer‘a hâzır olup bilesince Todora b. Kalod’u kıbel-i şer‘den vasî nasb olundukdan sonra ihzâr edip üzerine şöyle takrîr-i da‘vâ kılıp eyitti ki, müteveffâ[nın vasîsi] Todora zimmetinde on dört bin akçem olup sicillâta kayd olundu. Altı bin akçesin kabz ettim sekiz bin akçe dahi hakkım ve alımım kaldı, müteveffâ-yı mezbûrun terekesinden taleb ederim, dedikde mezbûr vasî inkâr edip gıbbe’l-inkâr müdde‘î-i mezbûrdan alâ sıdk-ı da‘vâhu beyyine taleb olundukda Hüseyin b. Murad ve Veli b. Habip ve Câbi b. Aslıhan hâzırûn olup şöyle edâ-i şehâdet-i şer‘iyye kılıp eyittiler ki, biz şehâdet ederiz mezkûr [vasî] Todora’nın mezbûr Hoca Emir’e sekiz bin akçe deyni ve alım vardır, evi ve bağı rehindir, diye şehâdet ettikden sonra şâhidûn-ı mezbûrûnun şehâdetleri alâ vechi’l-vasî hayyiz-i kabûlde vâkı‘ olup meblağ-ı mezbûr muhallefât-ı mezkûrdan hükm olunup gıbbe’t-taleb tescîl olundu. Tahrîren fî evâhıri evveli’r-Rebî‘ayn li-seneti erba‘ ve selâsîn ve tis‘a mi’e. Şuhûdü’l-hâl: Ali b. Musa, Timurhan Bey el-emîn, Karaca b. Abdullah, Kāsım Bey b. Abdullah el-bevvâb.