Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 205 Hüküm no: 301 Orijinal metin no: [46b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rus asıllı kaçak kölenin sahibine teslim edilmesi Vech-i tahrîr-i sicil budur ki Hamza nâm kimesne meclis-i şer‘a bir asferü’l-levn, eftehu’l-hâcibeyn, ezraku’l-ayneyn, evsatu’l-kāme, Rûsiyyü’l-asl başına sof külâh ve eğinine kara ağrız ve ayağına postal pabuç giyer abd-ı âbıkı tutup Çavuş Hayreddin âdemisi Mahmud’a teslîm olunup nafakası ve hıfzı için yevmî iki akçe takdîr olundu. Tahrîren fî 7 evâhıri’l-Cumâdeyn sene 931. Şuhûdü’l-hâl: Berber Ahmed b. Musa, Kulağuz b. Aslıhan ve gayruhümâ. Mezkûr kulun mevlâsı Ahmed b. Mehmed an kazâ-i Ada an karye-i Çaybaşı gelip zikr olan gulâm müddet-i örfiyyesinden hâric üç-dört ay kulluk ettirip ikrârları ile sâbit olduktan sonra tarafeynden bir akçe almamak üzere zikr olan gulâm Gerede’li Mustafa’ya teslîm olunup ol dahi mevlâsına teslîm eylediği sebt-i sicil olundu. Tahrîren fî evâili Şevvâli’l-mükerrem sene 931. Şuhûdü’l-hâl: İsa Bâli b. İlyas, Dindar b. Mustafa, Mustafa b. Dindar, İmirza b. Dindar ve gayruhüm.