Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 205 Hüküm no: 302 Orijinal metin no: [47a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaçak kölenin sahibine teslim edilmesi Tafsîl budur ki Karye-i İstavros’dan Dimitri b. Tıranos meclis-i şer‘de esmerü’l-levn, efraku’l-hâcibeyn, ganemü’l-ayneyn tıraşî başının sol cânibinde bir mikdâr kılıç yarası var ve başına siyah köhne külâh ve eğinine ak aba ve ağrız benevrek ve ayağına çarık giyer Moskoviyyü’l-asl abd-ı âbıkı tutup İstavros Câbisi Ali’ye teslîm olunup nafakası ve hıfzı için yevmî ikişer akçe takdîr olundu. Tahrîren fî evâili Zilka‘de sene selâsîne ve tis‘a mi’e. Şuhûdü’l-hâl: Mahmud el-müezzin, Kāsım b. el-Hâc Ali, Mustafa b. Ahmed. Mezkûr [u] mevsûf abd-ı âbıkın sâhibi kazâ-i Ada’dan karye-i Uruzlar’dan Yusuf b. Veli nâm kimesnenin imiş. İ‘timâd olunduğu ecilden teslîm olunup deftere sebt olundu. Tahrîren fî 18 Zilka‘de sene selâsîne ve tis‘a mi’e. Şuhûdü’l-hâl: İbrahim Halife b. merhûm Hayreddin Halife, Hasan b. Sarıca.