Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 223 Hüküm no: 350 Orijinal metin no: [51b-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Başıboş atın sahibine teslim edilmesi Vech-i tahrîr-i hurûf budur ki Karye-i Soğanlık dâiresinde tutulan bir yava bârgiri Şaban b. Turahan tutup mezkûr zâbıtu’l-avâbık olup teslîm olundu. Şuhûdü’l-hâl: Mehmed b. Süleyman, Halil b. İsmail ve gayruhüm. Zikr olunan bârgir kazâ-i Gekvize’de karye-i Kartal’ı mukāta‘aya tutan Mustafa b. Gaybi’ye hükm olundukdan sonra müddet-i örfiyyesi tamâm olunup mirâren mezâd olundukdan sonra yüz kırk akçeye bey‘ olunup otuz akçe nafakasına ve yedi akçe resm-i sicile ve üç akçe dellâliye cem‘an kırk akçe olup ve yüz akçesi zikr olunan Mustafa b. Gaybi’de emânet konulup sebt-i sicil olundu. Tahrîren fî evvel-i Ramazâni’l-mübârek sene 931. Şuhûdü’l-hâl: Mevlâna İbrahim b. Halife, Memi b. Süleyman ve gayruhüm.