Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 262 Hüküm no: 446 Orijinal metin no: [63b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Engürüs asıllı kaçak kölenin sahibine teslim edilmesi Vech-i tahrîr-i sicil budur ki Hasan b. Sarıca meclis-i şer‘a bir kumralü’ş-şekl, eftehu’l-hâcibeyn, eşhelü’l-ayneyn, kāimü’l-enf, Engürüsiyyü’l-asl başına deri takye ve eğinine kebe yelek ve kır benevrek ve ayağına kara ağrız çakşır ve ayağına kurt ağzı pabuç giyer abd-ı âbıkı yevm-i îydde tutup Timurhan’a teslîm eyleyip sebt-i sicil olundu. Tahrîren fî evâili Şevvâli’l-mükerrem sene 931. Şuhûdü’l-hâl: Süleyman b. Yusuf, İvaz b. Musa, İvaz b. Mehmed ve gayruhüm. Mezkûr [u] mevsûf abd-ı âbıkın sâhibi mahrûse-i Kostantıniyye’de mütevattın muhzırbaşı Yahşi b. Abdullah nâm kimesne mevlâsı olup âdemisi Mehmed b. Abdullah’a teslîm olunup ve mezkûr Mehmed’in nefsine ve mâlına Üsküdar Subaşısı kefîl taleb eyledikde nefs-i Üsküdar’dan Halvâyi Hasan b. el-Hâc Mehmed vech-i meşrûh üzere kefîl olup sebt-i sicil olundu. Tahrîren fî evâili Şevvâli’l-mükerrem sene 931. Şuhûdü’l-hâl: Kemal et-tâcir, Osman b. Zekeriya, Mustafa b. Abdullah ve gayruhüm.