Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 296 Hüküm no: 303 Orijinal metin no: [41b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mustafa’nın talebiyle boşandığı kocası Mustafa b. Mehmed’in ödemesi şartıyla küçük çocukları Zeyneb’e nafaka takdir edildiği Mahmiye-i İstanbul’da Kasım Ağa Mahallesi’nde sâkine Fâtıma bt. Mustafa nâm hatun tarafından husûs-ı âti’z-zikre vekîl olduğu zât-ı mezbûreyi ma‘rifet-i şer‘iyye ile ârifân Yusuf b. Süleyman ve Osman b. Mehmed nâm kimesneler şehâdetleriyle şer‘an sâbit olan Ahmed b. Mehmed nâm kimesne mahfil-i kazâda müvekkile-i mezbûre Fâtıma’nın zevc-i mutallakı Mustafa b. Mehmed nâm kimesne mahzarında bi’l-vekâle ikrâr ve takrîr-i kelâm ve tâʻbir ani’l-merâm edip mezbûr Mustafa’nın firâşından hâsıla ve müvekkilem mezbûreden mütevellide bi-hakkı’l-hıdâne hâlâ hacr ve terbiyesinde olan sadriye sagīre kızı Zeyneb’e kıbel-i şer‘den babası mezbûr Mustafa üzerine kadr-i ma‘rûf nafaka ve kisve-bahâ farz ve takdîr olunmak bi’l-vekâle matlûbumdur dedikde hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri dahi sagīre-i mezbûre Zeyneb’e tarafeynin rızâlarıyla târih-i kitâbdan beher yevm beşer akçe nafaka ve kisve-bahâ farz ve takdîr edip meblağ-ı mefrûz-ı mezbûru sagīre-i mezbûrenin levâzımına harc u sarfa ve lede’l-iktizâ istidâneye ve inde’z-zafer babası mezbûr Mustafa üzerine rücû‘a müvekkile-i mezbûre Fâtıma’ya kıbel-i şer‘den izin vermeğin mâ-vaka‘a bi’t-taleb ketb olundu. Fî-gurreti Cumâdelâhire sene 1121 Şuhûdü’l-hâl: Fazlullah Efendi el-Kâtib, Yusuf b. Süleyman, Osman b. Mehmed, Mustafa b. Şa‘ban, Ali b. İvaz ve gayruhum mine’l-huzzâr.