Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 295 Hüküm no: 302 Orijinal metin no: [41b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayram b. Mustafa b. Abdullah ile kardeşi Ahmed’in Bayram’ın hanımı Hadice’ye emanet verdikleri eşyalara karşılık iki guruş alarak sulh oldukları Medîne-i Hazret-i Ebû Eyyübe’l-Ensârî mahallâtından ( ) Mahallesi sükkânından olup kendi tarafından asıl ve li-ebeveyn karındaşı Bayram b. Mustafa b. Abdullah tarafından husûs-ı âti’z-zikre vekîl olduğu nehc-i şer‘î üzere sâbit olan Ahmed nâm kimesne mahfil-i kazâda sâbıkā mezbûr Bayram’ın zevcesi olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb Hadice bt. İbrahim nâm hatun mahzarında ikrâr ve takrîr-i kelâm edip bi-tarîkı’l-emâne bundan akdem mezbûre Hadice’ye eşyâ-i memlûkemizden iki sahan ve bir leğen ve bir köhne yorgan ve bir köhne çukamızı def‘ ü teslîm etmişidik hâlâ eşyâ-i muharrere-i mezkûreyi merkūme Hadice’den bi’l-asâle ve bi’l-vekâle taleb ve da‘vâ sadedinde olduğumuzdan ol dahi inkâr etmekle beynimizde nizâ‘-ı küllî cereyân etmişidi el-hâletü hâzihî beynimize muslihûn tavassut edip da‘vâ-yı mezbûremden beni mezbûre Hadice ile iki guruş üzerine sulh eylediklerinde ben dahi sulh-ı mezbûru bi’l-asâle ve bi’l-vekâle kabûl ve bedel-i sulh olan meblağ-ı mezbûr iki guruşu mezbûre Hadice yedinden tamamen ahz u kabz edip eşyâ-i muharrere-i mezbûreye müte‘allika âmme-i da‘vâdan mezbûre Hatice’nin zimmetini bi’l-asâle ve bi’l-vekâle ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Cumâdelâhire sene 1121 Şuhûdü’l-hâl: Mustafa b. İsmail, Ahmed b. Osman, Mehmed b. Abdullah, Mehmed b. Mustafa, Mustafa b. Mehmed ve gayruhum mine’l-huzzâr.