Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 273 Hüküm no: 471 Orijinal metin no: [67b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaçak kölelerin sahiplerine teslim edilmesi Kazıyye budur ki Küre-i ma‘mûrede Hacı Bâli b. el-Hâc Murad’ın bir asferü’l-levn, efraku’l-hâcibeyn, ezraku’l-ayneyn, evsatu’l-kāme İskender b. Abdullah nâm abdı ibâkat eyleyip ve el-Hâc Mustafa üstâd-ı fırın nâm kimesnenin bir asferü’l-levn ve efraku’l-hâcibeyn ve eşhelü’l-ayneyn Hudâverdi b. Abdullah nâm abdı ibâkat eyleyip Vezzân Mahmud nâm kimesnenin bir asferü’l-levn ve efraku’l-hâcibeyn ve eşhelü’l-ayneyn, tavîlü’l-kāme Şîrmerd b. Abdullah nâm abdı ıbâkat eyleyip kazâ-i Gekvize ve Yoros’da vâkı‘ olan yava ve kaçkun ve bâd-i hevâ ve gayrı tîmar kayd olunan zâbıtu’l-yava Çavuş Hayreddin habsinde mahbûs iken hâliyâ mezkûrûn Hacı Bâli ve Hacı Mustafa ve Vezzân Mahmud câniblerinden ebnâ-i sipâhiyan zümresinden Cafer Bey b. Mehmed el-kâtib ve Mahmud b. Karamanî et-tâcir şehâdetleri [ile] vekâleti sâbit olan Cârullah b. Hasan el-emîn bi-Küre-i ma‘mûre zikr olunan abd-ı âbıkları bi’l-vekâle Çavuş Hayreddin Bey yedinden teslîm olunup gıbbe’t-taleb tescîl olundu. Tahrîren fî evâili Muharremi’l-harâm sene hamse ve selâsîne ve tis‘a mi’e. Şuhûdü’l-hâl: Mustafa Çelebi b. Hızır Dede, İbrahim b. Gündüz el-câbi, Bâli b. Aslıhan, Pîri b. Aslıhan ve gayruhüm. Defter oldur ki Hâliya Sinan b. İskender’in...