Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 297 Hüküm no: 305 Orijinal metin no: [41b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in boşandığı kocası Mehmed b. Ahmed’den mehir bedelini alıp birbirlerinin zimmetini ibra ettikleri Mahmiye-i İstanbul’da Müftî Ali Çelebi Mahallesi’nde sâkine zâtı ta‘rîf-i şer‘î ile mu‘arrefe olan Âişe bt. Mehmed nâm hatun mahfil-i kazâda zevc-i dâhili işbu râfi‘u’l-kitâb Mehmed b. Ahmed nâm kimesne mahzarında ikrâr ve takrîr-i kelâm edip zevcim mezbûr Mehmed târih-i kitâb günü beni bâyinen tatlîk etmekle zimmetinde mütekarrer ve ma‘kūdün-aleyh olan yüz elli akçe mehr-i müeccelim ile bi’t-terâzî ta‘yîn olunan dört yüz elli akçe ki cem‘an altı yüz akçeyi zevcim mezbûr yedinden tamamen ahz u kabz edip hukūk-ı zevciyete ve târih-i kitâba gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan her birimiz âharın zimmetini ibrâ-i âm ile ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 5 min-Cumâdelâhire sene 1121 Şuhûdü’l-hâl: Mehmed Çelebi b. Mustafa, Mehmed Çelebi b. Eyüb, Hasan Beşe b. İbrahim, Mustafa b. Şa‘ban, Ali Çelebi b. İvaz ve gayruhum mine’l-huzzâr.