Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 297 Hüküm no: 306 Orijinal metin no: [41b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kömürcü Abbas b. Murtaza’nın Hacı Mahmud b. Hüseyin’e olan borcunu taksitler halinde ödemeyi taahhüt ettiği Kömürcü tâifesinden Abbas b. Murtaza nâm kimesne mahfil-i kazâda işbu râfi‘u’l-kitâb el-Hâc Mahmud b. Hüseyin nâm kimesne mahzarında ikrâr ve takrîr-i kelâm edip mezbûr el-Hâc Mahmud yedinden iştirâ ve kabz eylediğim vezni beynimizde ma‘lûm kömür-bahâsından ba‘de külli’l-hesâb seksen guruş deynim olup meblağ-ı mezbûru hâlâ ve def‘aten edâya iktidârım olmayıp te’cîl ve taksîte tâlib olduğumda mezbûr el-Hâc Mahmud dahi târih-i kitâbdan beher sekiz günde kendiye üçer guruş verip mecmû‘unu iki yüz günde tamamen edâ ve teslîm etmek üzere beni te’cîl ve taksît eyledikde ben dahi ber-vech-i muharrer te’cîl ve taksît-i mezbûru kabûl ve meblağ-ı mezkûru ber-minvâl-i muharrer mukassaten edâya ta‘ahhüd eyledim dedikde gıbbe’t-tasdîkı’ş-şer‘î yine tâife-i mezbûreden Hamza Bey b. Han Bey nâm kimesne meclis-i mezbûrda el-Hâc Mahmud mahzarında ikrâr ve takrîr-i kelâm edip işbu mezbûr Abbas’ın nefsine ve hîn-i mutâlebede meclis-i şer‘a ihzârına ve gaybet eder ise meblağ-ı mukassata-i mezkûre tarafeynden emr ve kabûlü hâviye kefâlet-i [42a] sahîha-i şer‘iyye ile ben kefîl ve dâmin oldum dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fî 4 min-Cumâdelâhire sene 1121 Şuhûdü’l-hâl: Mehmed Çelebi b. Abdi Kethüdâ, Abdullah Çelebi b. Mustafa, Ali Çelebi b. İvaz, Ali Çelebi b. Bâli, İsmail Bey b. Ali, Mustafa Çelebi b. Şa‘ban, Süleyman Çelebi b. Abdullah, Abdullah Çelebi b. Abdullah ve gayruhum mine’l-huzzâr.