Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 326 Hüküm no: 345 Orijinal metin no: [47a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. David v. Eci Can’ın daha önce yarısını sattığı evinin kalan yarısını da oğlu Panos’a sattığı Mahmiye-i İstanbul’da Kasım Ağa Mahallesi’nde sâkin David v. Eci Can nâm zimmî mahfil-i kazâda sulbî kebîr oğlu işbu râfi‘u’s-sifr Panos nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Avanis nâm zimmî menzili ve bir tarafdan İpekçi Ağya nâm zimmî tasarrufunda olan vakıf menzil ve bir tarafdan Medîne-i münevvere Vakfı’ndan olup Kirkor nâm zimmî tasarrufunda olan arsa-yı hâliye ve bir tarafdan tarîk-i âm ile mahdûd fevkānî iki bâb oda ve bir matbah ve bir sofa ve bir kenîf ve tahtânî bir bâb oda ve bir mikdâr bahçeyi müştemil mülk menzilimin nısfını oğlum mezbûra târih-i <> rakīmden on iki sene mukaddem yüz elli guruşa bey‘ ve teslîm ve kabz-ı semen etmişidim hâlâ nısf-ı âharını dahi tarafeynden îcâb [47b] ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile oğlum mezbûr Panos’a iki yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr iki yüz guruşu oğlum mezbûr yedinden tamamen ahz u kabz eyledim baʻde’l-yevm menzil-i mahdûd-ı mezkûrun mecmû‘u cemî‘ müştemilâtıyla oğlum mezbûrun mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 14 min-Cumâdelâhire sene 1121 Şuhûdü’l-hâl: İmâm-ı sâbık İbrahim Efendi b. Mahmud, İmâm-ı lâhık Abdullah Efendi b. Halil, İmâm Ahmed Efendi b. Hüseyin, Müezzin Abdullah Efendi b. Receb, Müezzin Mahmud Efendi b. Mustafa, es-Seyyid Yahya Çelebi b. Mehmed, es-Seyyid Feyzullah Çelebi b. Mehmed, Mehmed Çelebi b. Ömer, Mehmed Çelebi b. Ca‘fer ve gayruhum mine’l-huzzâr. Papa Serkis v. Bedros, Papa Harun v. Papa Avanis ve Papa Avanis v. Papa Simaven ve Arsun v. Melkon, Agoni v. David, Kirkor v. Haçador, Avanik v. David, Avanis v. Agop.