Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 328 Hüküm no: 347 Orijinal metin no: [47b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Refia Hatun bt. Hüseyin’in çeşitli eşyalarını borcuna mahsuben Hüseyin Çelebi b. Mehmed’e sattığı Mahmiye-i İstanbul’da Ördek Kasab Mahallesi’nde sâkine Refia bt. Hüseyin nâm hatun ba‘de’t-ta‘rîfi’ş-şer‘î meclis-i şer‘-i şerîf-i enverde işbu râfi‘u’l-kitâb Hüseyin Çelebi b. Mehmed nâm kimesne mahzarında ikrâr ve takrîr-i kelâm edip emlâkimden beş köhne minder ve sekiz köhne çatma yasdık ve iki dimi yasdık ve iki beledî döşek ve sekiz köhne yorgan ma‘a çârşeb ve dokuz sahan ve dört tencere ve bir leğen ma‘a ibrik ve bir tâbe ve iki keçe ve dört köhne yan keçesi ve bir köhne orta keçesi ve bir seccâde ve bir güğüm ve yirmi miskāl altın bilezik ve bir altın cevâhirli kuşak, üçer ayaklı bir çift zümrüd küpe ve bir cedîd yeşil ferâce ve bir hamam tası ve bir hoşâb tası ve bir köhne kapı perdesi ve üç minder çârşebimi mezbûr Hüseyin Çelebi’ye bi-safkatin vâhidetin yüz altmış dokuz guruşa bey‘ ve teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz ve kabûl eylediğinden sonra semeni olan meblağ-ı mezbûr yüz altmış dokuz guruşun yüz elli guruşunu mezbûr Hüseyin Çelebi’ye cihet-i karzdan yüz elli guruş deynim olmağla ol mikdârına takās ol dahi mukāssa ve kabûl edip meblağ-ı bâkī on dokuz guruşu mezbûr Hüseyin Çelebi bana def‘ ü teslîm ben dahi yedinden ahz u kabz eyledim baʻde’l-yevm eşyâ-i muharrere-i mezkûre mezbûr Hüseyin Çelebi’nin mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 11 min-Cumâdelâhire sene 1121 Şuhûdü’l-hâl: Ahmed Ağa b. Mustafa, Mehmed Çelebi b. Osman, es-Seyyid Mehmed Çelebi b. Mustafa, Mehmed Çelebi b. Resul, Osman b. Ali, Monla Yusuf b. Abdullah, Mustafa b. Salih, Mustafa Çelebi b. Şa‘ban, Hasan Çelebi b. Abdullah ve gayruhum mine’l-huzzâr.