Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 170 Hüküm no: 328 Orijinal metin no: [39a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emir b. Çepni’nin Zaroz’dan alacağı parayı kefil Dranoz’dan aldığı Sebeb-i tahrîr-i sicil budur ki Emir b. Çepni şer‘-i şerîf-i Nebevî meclisinde ikrâr [ve] i‘tirâf edip dedi ki karye-i Darıca’dan Zaroz nâm zimmîye iki bin akçe vermiş idim karye-i Çengel’den Dranoz nâm kâfir zikr olan mala kefîl bi’l-mâl olmuş idi hâliyâ mezkûr Dranoz’dan zikr olan akçeyi bî-kusûr aldım mezbûrların üzerlerinde bir akçem ve bir habbem kalmadı min ba‘d da‘vâm ve nizâ‘ım yoktur deyicek mukırr-ı mezbûru mukarrun lehü’l-mezbûr Dranoz tasdîk [edip] dedi ki mezbûr Çepni’ye kefâletten lâzım olan deynimi bî-kusûr verdim haklaştık dedikden sonra mezkûrların ikrârları istimâ‘ olup mâ hüve’l-vâkī‘ mezbûr Dranoz talebiyle tescîl olundu. Tahrîren fî evâili Cemâziyelâhir sene 941. Şuhûdü’l-hâl: Yakub Halîfe b. Ali ve Kepçe Süleyman b. Abdi ve Bâli b. Aslıhan ve gayruhüm.