Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 171 Hüküm no: 332 Orijinal metin no: [39b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ramazan ve Mehmed b. Abdullah’ın alacak verecek davasından sulh oldukları Sebeb-i tahrîr-i sicil budur ki Karye-i Samandıra’dan Ramazan nâm kimesne Mehmed b. Abdullah’ı meclis-i şer‘a ihzâr eyleyip müşârün-ileyh Ramazan takrîr-i merâm kılıp eyitdi ki işbu Mehmed’de koyun bahâsından dokuz yüz elli ve Çepni oğluna havâle olandan bin beş yüz mezbûr Mehmed’in üzerinde bu mikdâr akçem vardır hâliyâ taleb ederim deyicek mezkûr Mehmed’den su’âl olundukda cevâb verip dedi ki zikr olan meblağ için mezkûr Ramazan ile ıslâh-ı ibrâ ve ıslâh olmak üzre otuz iki koyun verdim teslîm dahi eyledim ol dahi bedel-i sulhü kabûl ve kabz eyledi dedikde mezkûr Ramazan bi’l-muvâcehe tasdîk edip eyitdi ki koyun bahâsını sulh ettik ve lâkin Emir b. Çepni’ye havâle olan meblağ sulhümüzde bilece dâhil değildir deyicek mezbûr Mehmed’den havâle olan Çepnioğlu akçesi bile dâhildir deyû beyyine taleb olundukda Kāsım Bey b. Abdullah ve Hacı b. Durmuş mezkûr Mehmed’in da‘vâsına mutâbıku’l-lâfz ve’l-ma‘nâ şehâdet-i şer‘iyye kıldıklarından sonra mezkûrların şehâdetleri hayyiz-i kabûlde vâkī‘ olup zikr olan sulh ve ibrânın cevâzına hükm olunup mâ hüve’l-vâkī‘ Mehmed talebiyle tescîl olundu. Tahrîren fî evâsıtı Recebi’l-mürecceb sene ihdâ ve erba‘în ve tis‘a mi’e. Şuhûdü’l-hâl: Ömer Subaşı Karamanî ve Ahmed Bey b. Abdullah ve Hasan b. Mürsel ve Şaban b. Yusuf ve İbrahim b. Ali ve Hızır muhzır-ı Üsküdar ve Lütfi Reis [b.] Hüdâvendigâr ve gayruhüm.