Üsküdar Mahkemesi 9 Numaralı Sicil (H. 940-942 / M. 1534-1536) cilt: 4, sayfa: 173 Hüküm no: 335 Orijinal metin no: [40b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Matyoz’un yetimi Aleksi’ye düşen hisse miktarı Sebeb-i tahrîr-i sicil budur ki Müteveffâ Matyoz’un yetimi Aleksi nâm sagīrin vasî-i şer‘îsi olan Papayakim nâm zimmî Toma b. Canikopulo ile meclis-i şer‘de hâzırân olup mezkûr Papayakim takrîr-i da‘vâ kılıp eyitdi ki mezkûr yetimin babasından cihet-i irsle intikāl eden evden ve bahçeden hissesin taleb ederim hâliyâ merkūm Toma mâni‘ olur deyicek müşârün-ileyh Toma’dan su’âl olundukda müteveffâ Matyoz büyük oğlu Andronikoz’a zikr olan evi ve bahçeyi hâl-i hayâtında hibe eylemiş idi mezbûr Andronikoz fevt olup yetimlerine vasî olduğum sebebden ben zabt ederim dedikden sonra mezkûr Papayakim bi’l-mukābele cevâb verip eyitdi ki mezkûr Matyoz zikr olan emlâki büyük oğlu Andronikoz[’a] hibe eylemiş lâkin hibesinden rücû‘ edip nice müddet zikr olan bahçeyi ve evi mülkiyyet üzre tasarruf edip taht-ı tasarrufunda iken fevt oldu dedikde mersûm Papayakim’den alâ mâ-idde‘â’ beyyine taleb olundukda Manol b. Kosta ve Todora b. Doroş şer‘-i şerîf meclisinde li ecli’ş-şehâde hâzırân olup şöyle edâ-i şehâdet-i şer‘iyye kılıp eyitdiler ki mezkûr Matyoz zikr olan emlâki oğlu Andronikoz[’a] hibe eyleyip yine rücû‘ edip müddet-i medîde zikr olan evde sâkin olup ve bahçeyi dahi mülkiyyet üzre mutasarrıf olup kendinin zabtında ve taht-ı tasarrufunda iken fevt oldu biz bu husûsa şâhidleriz ve şehâdet dahi ederiz dediklerinden sonra ba‘de’t-tezkiyyeti’ş-şer‘î mezkûrların şehâdetleri hayyiz-i kabûlde vâkī‘ olup zikr olan evden ve bahçeden mezkûr Papayakim vasî olduğu Aleksi nâm yetime on bin beş yüz akçelik hisse ta‘yîn olunup hükm olundu alâ mâ hüve’l-vâkī‘ vukū‘ üzre bi’t-taleb tescîl olundu. Tahrîren fî evâili Zilhicce sene 940. Şuhûdü’l-hâl: Bâli b. Aslıhan ve Korucu Hacı b. Abdullah ve İskender b. Abdullah ve Berber Ahmed b. Dellâk ve Nerses b. Ermeni ve gayruhüm.